الأبوذية

[عواطف عبداللطيف]

حبي إلك مثل الماي وأصفة
ما أكدر أبد أحجي ووصفة
ترة طبتك عليه عدال وصفة
تطيبني ونرد الروح ليه

[الدكتور اسعد النجار]

اسمك بالكلب ساكن وجدماي = محال انه اطفيها وجدماي

كلي شلون اصل يمك وجدماي =تتراجف واظنها تخون بيه

[الدكتور اسعد النجار]

الزمن ما يوم فرحنه وسرنه

بدرب الخير عدينه وسرنه

ما جانه خبر جيته وسرنه

اركص حتى وانثر واهليه

[فاتن الأحمدي]

منو الجابك الشوفي وعنك
معقولة الهوى هزك وعنك
ترى الناس الحجوا عني وعنك
تغار تريد مانكعد سوية

[الدكتور اسعد النجار]

أيامي المضت يا صاح ونها

حسرات الصدر ينسمع ونها

جنت آمر وانهي كبل ونها

صرت بزمن بس يأمر عليه

[الدكتور اسعد النجار]

مدلل بالحسن لا بسله حله

كمشت خده وصرخ يهواي حله

كتله وين تسكن كال حله

عراقي ونخوتي تبكه سجيه

[الدكتور اسعد النجار]

كلبي احترك من هجرك وجدماي

كلي شلون اطفيها وجدماي

شلون اكرب واصل يمك وجدماي

ترعش والهجر ولفي أذيه

[ابتسام السيد]

والقلب ينشد على اللي يوده
ياأم النبع وحنه وورده

[الدكتور اسعد النجار]

راحن للمحل سمره وشكره

عليجن الله ساعدني وشكره

مو مر العسل ريكه وشكره

ميضر العسل لوخذت ميه

[الدكتور اسعد النجار]

درب المحب كلي روج جنبي

اتمنه كلتله تصير جنبي

والله من دربكم صار جنبي

شوفني الهموم وكل أذيه

[الدكتور اسعد النجار]

بشهر الخير مكتوبك وصل لي

يكلي لله تتوجه وصل لي

بلكي يفرج همومك وصل لي

وبالجنه نعيش احنه سويه

[الدكتور اسعد النجار]

بظلمة ليلي تبكه انت لاله

تنساني يكلي كتله لاله

عطر الورد انت احله لاله

شلون انساك وانت النسمه ليه