دارميات عراقية 2

[عواطف عبداللطيف]

انطرت منك وفه رحت بعدت لبعيد
تاليها ناسي الدرب حتى الحجي ميفيد

[الدكتور اسعد النجار]

انطرت منك وفه رحت بعدت لبعيد
تاليها ناسي الدرب حتى الحجي ميفيد


ماناسي والله الدرب بس الزمن أغبر

شحجي شكولن بعد ودنشوف المقدر

[عواطف عبداللطيف]

فوك الزمن والوجع هم بعدت انته
انت الضوة للدرب هو اللي رايدته

[عواطف عبداللطيف]

ما ادري شنهو الچرة وتغيير الاحساس
گلمن يريد العصا حتى البشر ينداس

[حسن العلي]

يا يــوم افــز والگـاك متــوســــــــــــد ايــدي
ولـو صــدگـ صــارت هــاي صدگنــي عيــدي

[الدكتور اسعد النجار]

ما ادري شنهو الچرة وتغيير الاحساس
گلمن يريد العصا حتى البشر ينداس



الطمع هو الذي غير اهوايه ناس

والزمن خله الردي يتهاده فوك الراس

[عواطف عبداللطيف]

صفعة واجتني بليل خلتني ما نام
وخلتني أروح بعيد وألعن الأيام

[عواطف عبداللطيف]

صفعة واجتني بليل فتحت جروحي
والوجع صار هواي عذبلي روحي

[حسن العلي]

ملهوف اجاني العيد، هاااا گتله شتريد = راويته جرح هواي ظل يلطم العيد

[الدكتور اسعد النجار]

صفعه واجتني بليل والكلب حيران

لن نوره شع وكال اشبيك جفلان

[عواطف عبداللطيف]

ملهوف اجاني العيد ما يدري همي
ضل صافن ومحتار من صفة يمي

[عواطف عبداللطيف]

ملهوف اجاني العيد يسألني عنكم
وعطر النبع ديفوح مو مني منكم

[عواطف عبداللطيف]

صفعة واجتني بليل والگلب تعبان
يكفي عذاب هواي هم آني انسان

[عواطف عبداللطيف]

صفعة واجتني بليل والگلب تعبان
تدري يبعد الروح هم آني انسان

[الدكتور اسعد النجار]

من اسمعت بالعيد اتذكرت أنه صباي

واللعب يامحلاه يم ترعة الماي

[الدكتور اسعد النجار]

يانبع الله عليك هم يرجع الراح

كلبي عليل وذاب من كثر ماناح

[عواطف عبداللطيف]

گلبي عليل وذاب ليش انت عفته
ينشد عليك الناس والحسرة دگته

[عواطف عبداللطيف]

ينشد عليك الناس والدمع جاري
اشتاگ إلك يهواي ليلي ونهاري

[عواطف عبداللطيف]

اشتاگ إلك يهواي ما اكدر انساك
والوجع صار جبال من اثر فرگاك

[عواطف عبداللطيف]

والوجع صار جبال من رحت لبعيد
صح الجسم وياي بس عندك ايريد

[الدكتور اسعد النجار]

ما أدري شنهو اصار رحت وعفتني

انت الكلب والروح ليش هجرتني

[عواطف عبداللطيف]

انت الگلب والروح يالماردتني
مگدر ابد أنساك يالعذبتني

[عواطف عبداللطيف]

مگدر ابد أنساك يابعد عمري
ناشدت رب الكون سلمته أمري

[الدكتور اسعد النجار]

مكدر أبد أنساك وانته حياتي

لو رحت عني ابعيد يكرب مماتي

[عواطف عبداللطيف]

لو رحت عني بعيد گلبي يتچوة
منهو اليرد الروح ياهل المروة

[الدكتور اسعد النجار]

الولف من فركاه شفت المصايب

درحع يخي ونعيش كلنه حبايب

[ناظم الصرخي]

يا صاحبي انعزيك .... لو نحزن وياك
ماينحمل فركاه .... يستاهل هواك

[عواطف عبداللطيف]

ما ينحمل فركاه بس كافي مو عاد
والگلب ظل محتار لما الوجع زاد

[الدكتور اسعد النجار]

ماتنحمل فركاه مساهر أنه الليل

دهري يبعد جلاي عتني وصحت حيل

[عواطف عبداللطيف]

چم آخ أكول اليوم والوجع ماخذني
أمشي وأون عليك والدرب ما هدني

[عواطف عبداللطيف]

ماتنحمل فركاه مساهر أنه الليل

دهري يبعد جلاي عتني وصحت حيل


دهري يبعد جلاي خلاني اتانيك
عايش تظلي دوم بس الله يهديك

[عواطف عبداللطيف]

عايش تظلي دوم الفرگة ُمُرة
والبعد هم وطاح حيرني بأمرة

[عواطف عبداللطيف]

البعد هم وطاح غيرلي حالي
من روحتك لليوم مدري شجرالي

[عواطف عبداللطيف]

من روحتك لليوم گلبي يون وَنْ
بس لا أگله بعيد يعذبني لو حَنْ

[عواطف عبداللطيف]

بس لا أگله بعيد ويصفن صفته
يتاچيني لو زليت ولگبري ردته

[عواطف عبداللطيف]

يتاچيني لو زليت بگليبي أضمه
وعطر الحنان يفوح لمن أشمه

[عواطف عبداللطيف]

عطر الحنان يفوح من يمشي يمي
يمسح دمعتي بشوگ ويداري همي

[حسن العلي]

متعنية للعباس أبجي بحضرته
والينكسر يهواي شنهي جبرته

[حسن العلي]

آنه أون والحسرات إيونن وياي

كل هذا ماخليت شامت دره بهاي

[الدكتور اسعد النجار]

عطر الحنان يفوح خيل ارد أشمه

وأتمنه ليل نهار كون آنه يمه

[عواطف عبداللطيف]

و أتمنه ليل نهار أكعد وحاچيه
راح وبعد لبعيد اشلون اراضيه

[حسن العلي]

كل جرح بيه يطيب أكدر على دواه
بس جرحي من فركاك متحير وياه

[حسن العلي]

بين الكَلب والروح بستان الك خاص
واهديلك العينين واحسبهن رخاص

[حسن العلي]

صحح اليغيب هواي يتسمى مفقود
بس انت من تغيب بنص روحي موجود

[حسن العلي]

ورقة وقلم كضيت ردت أكتب أنساك
أوصل لحد النون وأكتبها أهواك

[عواطف عبداللطيف]

بين الكَلب والروح بستان الك خاص
واهديلك العينين واحسبهن رخاص


انت الكَلب والروح مگدر اعوفك
واهديلك العينين لمن اشوفك

[الدكتور اسعد النجار]

صحح اليغيب هواي يتسمى مفقود
بس انت من تغيب بنص روحي موجود


الماتوشفه العين الكلب يسلاه

بس انت من تغيب رسمك شمحلاه

[الدكتور اسعد النجار]

ورقة وقلم كضيت ردت أكتب أنساك
أوصل لحد النون وأكتبها أهواك



اكمشت القلم يهواي ردت اكتب انساك

من وصلت للياء اكتبت أهواك

[عواطف عبداللطيف]

ليش بعدت لبعيد رحت وعفتني
بعروگي نام الهم من فاركتني

[عواطف عبداللطيف]

بعروگي نام الهم يومية أنسَّم
متگلي بعد اشلون الجرح يلتم

[عواطف عبداللطيف]

متگلي بعد اشلون تغمض عيوني
والدمع من فرگاك رمَّد اجفوني

[عواطف عبداللطيف]

والدمع من فرگاك عذبلي حالي
تدري يبعد الروح شنهو الچرالي

[عواطف عبداللطيف]

تدري يبعد الروح ما يوم أملك
انت طلعت بذات آنه ارد اگلك

[عواطف عبداللطيف]

أنت طلعت بذات ولگلبي عفته
رحت بطريق بعيد والوعد خنته

[عواطف عبداللطيف]

رحت بطريق بعيد ما منه رجعه
والوجع چوة الروح منهو ليسمعه

[عواطف عبداللطيف]

والوجع چوة الروح ما منه چاره
تدري انت حبك زين ماخذ قراره

[عواطف عبداللطيف]

تدري انت حبك زين ما بقى دمعه
شلون أهدي الروح وشلون أجرعه

[الدكتور اسعد النجار]

تدري انت حبك زين ما بقى دمعه
شلون أهدي الروح وشلون أجرعه


تدري انت حبك زين بالكلب ثابت

واسمك يبعدجلاي بالروح نابت

[عواطف عبداللطيف]

اسمك يبعد چلاي هم سگن گلبي
لتصدك آني انساك دومك بدربي

[الدكتور اسعد النجار]

اسمك يبعد چلاي هم سگن گلبي
لتصدك آني انساك دومك بدربي




اسمك يحلو الطول ماني نسيته

كافي هجر وبعاد كلبي جويته

[الدكتور اسعد النجار]

متگلي بعد اشلون تغمض عيوني
والدمع من فرگاك رمَّد اجفوني




متكلي بعد اشلون ياولفي أبره

من الألم والآه موتني قهره

[عطاء محمد]

موتني قهر هواي مكدر اعوفه
ترتجف كل اعضاي لمن اشوفه

[الدكتور اسعد النجار]

موتني قهر هواي مكدر اعوفه
ترتجف كل اعضاي لمن اشوفه



موتني قهر اهواي من مشه لليوم

وعيوني بس دموع ماشافت النوم

[عواطف عبداللطيف]

ما شفت طعم النوم من رحل لبعيد
اشلون اهدي الروح والحچي ميفيد

[الدكتور اسعد النجار]

ما شفت طعم النوم من رحل لبعيد
اشلون اهدي الروح والحچي ميفيد


اشلون أهدي الروح والكلب موجوع

وحبل الوصل وياك موشفته مكطوع

[عطاء محمد]

مكطوع حبل الوصل والدرب ظلمه
جا وين اروح اشلون وكَلليبي يمه

[عواطف عبداللطيف]

جا وين اروح اشلون والگلب موجوع
وأنت يابعد الروح بعيوني مزروع

[قصي المحمود]

الدروب وحشه والدنيا ظلمه
وحيرتي بالعشك وين اضمه
الله عليج ىساعديني يا يمه

[ناظم الصرخي]

ياتـرف گلـي اشبيـك تخزرنـه وتـروح
لتعاين اعله الشيب عاين على الروح

[عواطف عبداللطيف]

لتعاين اعله الشيب بگليبي اشوفك
هاك اخذ روحي وياك لا ما اعوفك

[الدكتور اسعد النجار]

هاك اخذ روحي وياك يلعذبتها

داويها بسك عاد مو نحلتها

[ناظم الصرخي]

للموت اظلن شاب بالحب والاحساس
والگلب اخضر دوم لو شيب الراس

[الدكتور اسعد النجار]

والكلب أخضر دوم رغم الأشوفه


ولفي وعلي غالي وشلون أعوفه

[قصي المحمود]

الشيب ما هو علّة لو غزى الراس
يلمع تراه بالايد مثل محبس الماس

[عواطف عبداللطيف]

ولفي وعلي غالي العذر شيفيد
شيبت حتى الراس من المواعيد

[قصي المحمود]

يا بعد الروح لا تهيج جروح
تدري النفس انت ..والروح
يوم الخلفت غصبن عليه

[ناظم الصرخي]

شايب على عكاز دهره النچل بيه
بس من تمر يفلان وحدك تداويه

[عواطف عبداللطيف]

بس من تمر يفلان تكمل الفرحة
والگلب من يلگاگ يداوي جرحه

[الدكتور اسعد النجار]

والكلب من يلكاك اعليك يتصبه

مأمن يولفي هواي وماشي بدربه

[علي الربيعاوي]

دارميات

-------------

متعنيه للعباس ابجي بحضرته
والينكسر يهواي شنهي جبرته
****
آنه أون والحسرات ايون وياي
كل هذا ما خليت شامت دره بهاي
****
عن ديرة الينهون يهواي امشنه
ما يلحك الطالوب غابت شمسنه
****
شمسويه آنه بدنياي واشيتي سبعه
والثامن زغيرون يومي بصبعه
****
يايمه ماتبجين مثلي عله اهواي
من جنتي بالعشرين ما صابج الداي

-------------------

من الموروث الميساني

[عواطف عبداللطيف]

متعنية للعباس يا بعد عيني
والنذر دسته شموع لمن تچيني

[الدكتور اسعد النجار]

انذرت دسته اشموع ليك ابو فاضل

وعراكنا من الكاه بالأمن حافل

[قصي المحمود]

يبو راس الحار بيك احلفت بيك
مرادي من تنطيه أتعنى وأجيك

[عواطف عبداللطيف]

مرادي من تنطيه أشعل الشموع
والصبح لو يلگاك ينسيني الدموع

[الدكتور اسعد النجار]

اتعنيت انه العباس وطلبت منه

يجعل عراقي بخير ويزيد أمنه

[عواطف عبداللطيف]

يرجع عراقي بخير ونلتم كلنه
ومن تراب الگاع نعجن الحنة

[سلمى الزياني]

جميلة هي الدارميات العراقية رغم شجنها
بعضها فهمته و الاخر لا ..
دمتم برقي و دام شعب العراق بخير و محبة
تقديري

[قصي المحمود]

جميلة هي الدارميات العراقية رغم شجنها
بعضها فهمته و الاخر لا ..
دمتم برقي و دام شعب العراق بخير و محبة
تقديري


نيابة عن العراقيين..لك اجمل التحيات
الفاضلة سلمى..
ككل العرب..النجباء..العراقيون شعب كريم
ونقي..
تحياتي وامتناني

[عواطف عبداللطيف]

جميلة هي الدارميات العراقية رغم شجنها
بعضها فهمته و الاخر لا ..
دمتم برقي و دام شعب العراق بخير و محبة
تقديري


ممكن أن تسألي عن كلمة لم تفهمي معنها لأنها باللغة العراقية الدارجة
واللغات الدارجة تختلف من بلد إلى آخر
شكراً لمرورك
وتقويمك
محبتي

[قصي المحمود]

هذا الحقد لا منه ولا من عدنه
لا من اب سمعناه ولا من جدنه
متخاوين دوم جيران وعم وخال
نعلة الله عليه كلمن ..يفرقنه

[ناظم الصرخي]

مدري شجا وشصار مانمت ليلي
مدري وجع العيون مدري دليلي

[ناظم الصرخي]

غربه ودمـع هيال فايض بدينه
مشتاگه للأحباب روحي الحزينه

[ناظم الصرخي]

أتمنه روحي اتصير نجمه وترابيك
وبهيده تالي الليـل انزل وشم بيـك

[ناظم الصرخي]

لا گلبي مره ايهيد لا عيني تغفه
لا صبر بيه ايفيد لا ناري تطفه

[عواطف عبداللطيف]

لا صبر بيه ايفيد لا أكدر أنساك
كل العذاب يهون والگلب يهواك

[عواطف عبداللطيف]

كل العذاب يهون من بعد عينك
اتمنه أكون وياك وأسمع ونينك

[الدكتور اسعد النجار]

أتمنه أكون وياك بالبيده وحدي

اتناغه آنه وياك ويزيد سعدي

[عواطف عبداللطيف]

اتمنه اكون وياك يا بعد عمري
من فرحتي بملگاك يطيح قهري

[عواطف عبداللطيف]

اتناغه آنه وياك وننسى الهموم
شلنا بعد بالناس مابيهم لزوم

[قصي المحمود]

احركني مثل الشمع
واملي عيني دمع
يمته تعود اليه

[ناظم الصرخي]

أتناغـه آنه ويـاك وتعـمْ الافـــــراح
هم نعمه لو فد يوم هالگلب يرتاح

[الدكتور اسعد النجار]

هم نعمة لو فد يوم شفتك كبالي

أنسه الحزن والآه وينسعد حالي

[عواطف عبداللطيف]

انسه الحزن والآه لو أنت يمي
ما ينحمل فرگاگ زيدلي همي

[الدكتور اسعد النجار]

ما ينحمل فركاك زيد اجروحي

اطعنت كلبي بسيف وتلفت روحي

[عواطف عبداللطيف]

اطعنت گلبي بسيف من رحت عني
بيدي اشعل الشمعات لو تبقى يمي

[عواطف عبداللطيف]

بيدي اشعل الشمعات وما يوم أملگ
الفرگة تچوي الروح من هسه أگلگ

[الدكتور اسعد النجار]

الفركه تجوي الروح ارحم ابحالي

وشعندي انه بدنياي غيرك يغالي

[عواطف عبداللطيف]

وشعندي انه بدنياي غيرك يغالي
متگلي شنهوالصار وشنهو الجرالي

[قصي المحمود]

من يوم فركاك الحزن لازماني
دمع وهموم من فركاك لازماني
ما رحمني لا هواك اليَّ ولازماني

[الدكتور اسعد النجار]

متكلي شنهو الصار يابعد روحي

ليش ابعدت يهواي وزيدت نوحي

[عواطف عبداللطيف]

ليش بعدت يهواي ولكليبي تجويه
تدري يبعد الروح بس انته تشفيه

[عطاء محمد]

بس انت بالدلال واسأل دليلك
ولهانه روحي اعليك ..الله وكيلك

[عواطف عبداللطيف]

ولهانة روحي عليه والدمع جاري
ياحبَيَبَه منهو الراح ياخذ بثاري

[الدكتور اسعد النجار]

يحبيبة منهو الراح كلبي يضمده

جرحي جبير وكون بيدك تشده

[عواطف عبداللطيف]

جرحي جبير وكون تگفي الإشارة
ومن الوجع مليت سـَويلي چارة

[الدكتور اسعد النجار]

امن الوجع مليت والنوح ملني

كافي هجر يهواي بعدك كتلني

[الدكتور اسعد النجار]

ولهانه روحي عليك والكلب فاير

سهران طول الليل اشرب جكاير

[عواطف عبداللطيف]

كافي هجر يهواي شنهو الچنيته
رحت بعدت لبعيد ولگلبي خذيته

[الدكتور اسعد النجار]

رحت ابعدت لبعيد وظليت بنياح

ابكيت وسط الماي مكصوص الجناح

[عواطف عبداللطيف]

ابگيت وسط الماي أنشد عليهم
والبعد هد الروح كله من ايديهم

[الدكتور اسعد النجار]

البعد هد الروج والكلب بنياح

ابكيت وسط الماي مكصوص الجناح

[عواطف عبداللطيف]

ابكيت وسط الماي والگلب مالوم
شنهو لجنيته وياك زيدت الهموم

[عطاء محمد]

لاتحسب الصدمات لاتحسب هموم
هم التشيله الروح يزدادا كل يوم

[عواطف عبداللطيف]

هم التشيله الروح يمطر الگ دم
والجرح من فرگاك ما يرضه يلتم

[ناظم الصرخي]

هم التشيله الروح مامثله موجود
لا لطم عالمتنين لاخرطـة اخدود

[عطاء محمد]

كافي قهر يهواي كافي ملامة
نهر الدمع مرسوم عالخد علامة

[الدكتور اسعد النجار]

نهر الدمع مرسوم علوجنه كالخال

والحزن طول الليل مثل المطر سال

[الدكتور اسعد النجار]

شنهو الجنيته وياك كل جسمي نحلان

بوسط البحر ظليت وكليبي عطشان

[عواطف عبداللطيف]

الحزن طول الليل هدني ولواني
متكلي يامحبوب شمسوية آني

[عواطف عبداللطيف]

بوسط البحر ظليت انطر يجيني
حتى السمچ بالماي يسمع ونيني

[عطاء محمد]

شمسويه انه وليش تشلع كَلليبي
انت النبع يهواي والهوى عذيبي

[عواطف عبداللطيف]

انت النبع يهواي ويهمني أمرك
والگلب كل مصباح لازم يذكرك

[عطاء محمد]

صباح الورد لعيونك حبيبي
يمن دون البشر ردتك نصيبي

[الدكتور اسعد النجار]

يمن دون البشر ردتك بكربي

انته اللي تداوي جروح كلبي

[هديل الدليمي]

من أحجي آنه وياك أنـــسى الأذيــــة
وانطيك كل الشوق صوغه وهديّه

[عطاء محمد]

أهديلك الدلال شدة رياحين
بس لاتروح بعيد يامقلة العين

[الدكتور اسعد النجار]

انطيك كل الشوك غنوة وهلاهل

وارسل الك أزهار ويه الرسايل

[الدكتور اسعد النجار]

بس لاتروح ابعيد ياحلو عني

ظهري انحنه ياصاح وزداد وني

[عواطف عبداللطيف]

انطيك كل الشوق ولا يوم املك
بس لا تروح بعيد انه ارد اكلك

[عواطف عبداللطيف]

ظهري انحنى ياصاح والشيب طايح
والشوگ جوه الروح كل يوم صايح

[ناظم الصرخي]

متعود المحبوب كل يوم إل َعتاب
مايـدري بالـدلال مـن الكبـت ذاب

[هديل الدليمي]

بالدنيا ما حبيت بس الله وانت
وباب الخيانه اليوم تبت وشلعته

[عواطف عبداللطيف]

باب الخيانة اليوم انت لفتحته
فوگ الوفه يهواي لگلبي عفته

[الدكتور اسعد النجار]

فوك الوفه يهواي كلبي تعذبه

بس الحزن والآه منه تكربه

[هديل الدليمي]

ردلي الكَلب يهواي وانطيك العيون
شــلّي بعيوني إذا.. عنهن تبعـــدون

[عواطف عبداللطيف]

ردلي الگلب يهواي يالرايد تروح
بُعدك يابعد العين زيدلي الجروح

[الدكتور اسعد النجار]

بعدك يبعد العين عذب احوالي

بس دمع بس آهات مدري اشجرالي

[عواطف عبداللطيف]

بس دمع بس آهات بعدك گتلني
والگلب مثل النار شب وحركني

[هديل الدليمي]

من أحجي ويّه الناس باسمك أناشد
كل الوجوه تـصيـر بعيــوني واحد

[الدكتور اسعد النجار]

من احجي ويه الناس شوفكري شارد

يمك يبعد الروح والكلب شاهد

[ناظم الصرخي]

فكري أنشده ياناس والجفن شاهد
نامت عيون الناس بس هوَ عانـد

[عواطف عبداللطيف]

نامت عيون الناس وعيوني تسعه
يمته تجي يهواي ولگلبي تسمعه

[هديل الدليمي]

يمته تجي وتعود يالغايب هواي
ارجع يبعد الروح لتشمّت اعداي

[عواطف عبداللطيف]

ارجع يبعد الروح وخلينه نرتاح
مل الگلب يهواي من كثر النواح

[الدكتور اسعد النجار]

مل الكلب يهواي بالضيم حاله

ماتدري شنهو الصار شنهو الجراله

[عواطف عبداللطيف]

ما تدري شنهو صار من فاركتني
اشلون انام الليل رحت وعفتني

[الدكتور اسعد النجار]

اشلون أنام الليل والكلب مجروح

كافي هجر يهواي مو تلفت الروح

[ناظم الصرخي]

الگلـب گنفذ صار من كثر السـهام
وانت خطف صابوك واتگلي مانام

[ناظم الصرخي]

عفت أهلـي عفت الناس وتولعت بيـك
صارتلي سلوه افلان كل ساعه اناديك

[الدكتور اسعد النجار]

عفت أهلي عفت الناس والحالي متحن

والكلب مني ذاب بس كاعد يون

[هديل الدليمي]

شبّت بكَلبي نار شوكَك علكَها
تاه الشته من الصيف من حر جمرها

[الدكتور اسعد النجار]

تاه الشته من الصيف حبك سطرني

ياولفي اجبل عاد هجرك يضرني

[هديل الدليمي]

بالكَلب كنّيت الك أجمل مشاعر
عقــــل ورزانه وأدب والنــوبه شاعر

[الدكتور اسعد النجار]

بالكلب رسم اهواي وخايف أنه عليه

رقة ولطف وابداع وحرفه يضويه

[ناظم الصرخي]

هاك اخذ گلبي اوياك يلماشي لهواي
گلـه انـزرف بجفـاه وبشـوفته ادواي

[الدكتور اسعد النجار]

كلبي انزرف بجفاه ودوايه عنده


وصبري يبعد الروح اتعده حده

[هديل الدليمي]

بُعدك سبه الدلاّل وعيوني تمطر
كلما نويت انساك عالبال تخطر

[الدكتور اسعد النجار]

كلما أريد أنساك تبقه عله بالي

متكلي تالي وياك ارحم بحالي

[هديل الدليمي]

مرمرني هذا الشوك حركَتني ناره
ما أكَـدر بلـــياك ســويـــلي جاره

[ناظم الصرخي]

لاتظـن آنـي انسـاك لـو تمطـر بـدم
والبحر گاع ايصير وشموسي تعتم

[هديل الدليمي]

كون الحزن ألوان واغسلها بهداي
واجليها بالصابـــون لــو ما نفـــع ماي

[الدكتور اسعد النجار]

أجليها بالصابون ياولفي روحي

بعنادك المعروف زادن جروحي

[هديل الدليمي]

راهنت عالنسيان وحلفت اتركك
منطاني فكّه الشوك ورجعت احبّك

[الدكتور اسعد النجار]

منطاني فكه الشوك جيت ارد اشوفك

حبك ابوسط الروح ومكدر أعوفك

[عواطف عبداللطيف]

حبك بوسط الروح يابعد عيني
من كثر ما ونيت وأنطر تجيني

[الدكتور اسعد النجار]

من كثر ماونيت بفراكك انحيل

وعن اليودك ليش ياولفي تميل

[عطاء محمد]

ونيت انا بالليل والسبب دنياي
جار الزمن يهواي ماانصف وياي

[هديل الدليمي]

بشاره ارد ابشر هواي خل تسمع الناس
فـزت بمحبتـي اليوم وانطيتـك الكاس

[الدكتور اسعد النجار]

جار الزمن يهواي والدهر ذبني

وانته بصدودك هاذ زيدت وني

[الدكتور اسعد النجار]

فزت بمحبتي اهواي وكليبي خذته

حبك بوسط الروح ورد وشتلته

[عطاء محمد]

ياورد يامعطار يافيض الاشعار
أحلى سلام اهديك وي سرب الاطيار

[الدكتور اسعد النجار]

أحله سلام أهديك ياحلو يسمر

من فركتك يهواي كلبي تمرمر

[هديل الدليمي]

عيوني أمدها بساط وبجفوني اغطّيك
ولو من عطش ونيت بدموعي اروّيك

[الدكتور اسعد النجار]

عيوني أمدها بساط وضلوعي الحاف

بحضني انيمك دوم بس انته لتخاف

[عواطف عبداللطيف]

عيوني امدها لحاف لمن تجيني
انت الگلب والروح يابعد عيني

[الدكتور اسعد النجار]

انته الكلب والروح وانته ضوه العين

من تبتعد وتروح ابكه آنه بالبين

[هديل الدليمي]

من تبتعـــد وتــروح تتـشــمت الناس
والدنيا ظلمة تصير وتضيك الأنفاس

[الدكتور اسعد النجار]

من تبتعد وتروح تتعذب الروح

وعظامي كلها تنود وتزيد الجروح

[هديل الدليمي]

بين الرمش والعين بيتك بنيته
باللهفة والأشواق كَلبي سبيته

[الدكتور اسعد النجار]

باللهفه والأشواك آنه اجيتك

وبدمع هاي العين والله سكيتك

[عواطف عبداللطيف]

باللهفة والأشواق بس اندعيلك
بالگلب ساكن دوم الله وكيلك

[الدكتور اسعد النجار]

بالكلب ساكن دوم وأشتاق اشوفك

مكدر على فركاك ومكدر اعوفك

[ناظم الصرخي]

مگـدر أظـل ويـاك مگــدر أعـوفــك
عركه الگلب والروح يوم النشوفك

[عواطف عبداللطيف]

عركة الگلب والروح لمن تجيني
والشوق إلك كومات يابعد عيني

[عطاء محمد]

يابعد عيني النوم جافاني فدنوب
رغم القهر واللوم منك فلا اتوب

[عواطف عبداللطيف]

رغم القهر واللوم حبي الك زاد
ليش بعدت لبعيد يمته تجي عاد

[عطاء محمد]

يمته تجي يهواي موخلص صبري
تحلى الحياة وياك يابعد عمري

[الدكتور اسعد النجار]

تحله الحياة وياك والكلب مرتاح

ويامي يامحبوب مليانه أفراح

[عواطف عبداللطيف]

ايامي يامحبوب تحلالي وياك
يمته تجيني عاد الگلب مشتاك

[الدكتور اسعد النجار]

يمته تجيني عاد وتوفي بوعودك

أيامي حلوة وياك تحله بوجودك

[هديل الدليمي]

ليت الكَلب بلور تكَدر تشوفه
وان شفت بيتك بيه ما اظن تعوفه

[الدكتور اسعد النجار]

ريت الكلب يلور ويصير الك بيت

تكعد كبالي دوم ترتاح ياريت

[هديل الدليمي]

هاك الكَلب والروح كلهن هديه
بس لا تجافي هواي واكَبل عليه

[الدكتور اسعد النجار]

هاك الكلب والروح بس تجي يمي

نعيش بفرح وسرور ويزول همي

[هديل الدليمي]

بالليل افكّر بيك جافاني نومي
بالحيره والحسرات خلصان يومي

[الدكتور اسعد النجار]

بالليل افكر بيك يابعد روحي

صدك يحلو الطول زيد اجروحي

[هديل الدليمي]

صح انت عني بعيد درب ومسافات
بس روحي طارت ليك ويه الحمامات

[الدكتور اسعد النجار]

صح انته عني ابعيد بس مسكنك هون

وسط الكلب يهواي تفاركني اشلون

[عواطف عبداللطيف]

ايامي حلوة وياك والگلب فرحان
چم آخ أكول اليوم لتكلي زعلان

[عواطف عبداللطيف]

چم آخ اكول اليوم والوجع ماخذني
أمشي وأون عليك والدرب ديردني

[الدكتور اسعد النجار]

أمشي وأون عليك والكلب موجوع

وصوت البجه يهواي للناس مسموع

[هديل الدليمي]

صرت آخذ الضحكات من دهري بالدّين
ومـن ابـجي تــطفر نـار وي دمـعة الـعيــن

[الدكتور اسعد النجار]

من أبجي تطفر نار من كلبي يهواي

ارجع يبعد الروح خليك وياي

[عواطف عبداللطيف]

ارجع يبعد الروح گلبي تمرمر
اسأل نجوم الليل والگمر لو مر

[الدكتور اسعد النجار]

أسأل نجوم الليل عنك يغالي

غيرك يبعد الروح محد حلالي

[هديل الدليمي]

لــيت التـحبه هـواي مـثلك يــحبك
ينثر وفه وريحان لو مشه بدربك

[الدكتور اسعد النجار]

ليت التحبه اهواي يصدك ابوعده

حبه الك جذاب لازم تصده

[هديل الدليمي]

لا تتهمني بزور بسّك ملامه
كَلبي نفخ بالصور واعلن قيامه

[الدكتور اسعد النجار]

لاتتهمني زور يابعد روحي

كلبي تعب والنوب زادن جروحي

[حسن العلي]

والماتريده الروح كشمرته بلوة

مثل اليزيح الماي كوة على علوة

[حسن العلي]

من أبجي تطفر نار من كلبي يهواي
ارجع يبعد الروح خليك وياي


من أبجي تطفر نار من كلبي يهواي
إرجع يابعد الروح لاتشمت عداي

[هديل الدليمي]

ليت العمر لوحات أرسمها بيدي
وطيفك يصير الوان من دم وريدي

[حسن العلي]

طيفك يصير ألوان من دم وريدي

وأرسم خدودك دوم أشتمها هيدي

[الدكتور اسعد النجار]

طيفك يصير ألوان واكتب قصيده

بلكي تجي يهواي ماهي بعيده

[عواطف عبداللطيف]

بلكي تجي يهواي وبعيني اضمك
وتعود إليه الروح لمن اشمك

[الدكتور اسعد النجار]

اتعود اليه الروح لمن أشوفك

بكليبي اسكنك دوم ومابعد اعوفك

[عواطف عبداللطيف]

بگليبي اسكنك دوم بس عود إليه
تمسحلي دمع العين وانسى الأذيه

[الدكتور اسعد النجار]

تمسحلي دمع العين وتشوف حالي

وتنظر يبعد الروج شنهو الجرالي

[هديل الدليمي]

لا كَلب لا نبضات لا حتى أنفاس
بغيابك المزعوم فاركَني الاحساس

[الدكتور اسعد النجار]

بغيابك المزعوم دلالي يسعر

بنار الحزن يفلان حتى العسل مر

[الدكتور اسعد النجار]

ارجع يبعد الروح وشوكت أحضه

بيك وأصيرن زين روحي مرضرضه

[هديل الدليمي]

حيره وأسى وأحزان ودموع العيون
حالي صعب يهواي من عنّي تمشون

[عواطف عبداللطيف]

حالي صعب يهواي من رحت لبعيد
مدري شكول للناس والوجع ديزيد

[الدكتور اسعد النجار]

مدري شكل للناس شنطيهم أخبار

حالتي صعبه اهواي اوموحشه الدار

[هديل الدليمي]

رفرفت روحي اليوم راحت للحسين
تمشي بــعزه المذبوح.. ويـــه المــلايـيــن

[الدكتور اسعد النجار]

تمشي بعزه المذبوج وتناجي أمه

زينب تره بهلحال بس هيه يمه

[هديل الدليمي]

زينب تره بهالحال نادت الكرار
وينك يبو الحسنين والدمع مدرار

[الدكتور اسعد النجار]

وينك يبو الحسنين يابويه وينك

بالبيده وحدي هناك من بعد عينك

[هديل الدليمي]

الوجع مو بالكَلب الوجع بالروح
جيّتك هي الدوة وبلسم للجروح

[الدكتور اسعد النجار]

جيتك هيه الدوه لجروحي كلها

غيبتك هيه السبب والروحي سلها

[هديل الدليمي]

آنه على درب الوفه شرّيت العيون
أمنيتي اشوفك طيف ويه اليمرون

[الدكتور اسعد النجار]

أمنيتي أشوفك طيف يابعد روحي

نتناغه آنه وياك وتشد جروحي

[حسن العلي]

اليمرون هواي لوناوي تشوف

حلاة الدرب من بيه الحروف

[هديل الدليمي]

نتناغه آنه وياك والسطر شاهد
يحلى الكلام وياك والليل ساهد

[عواطف عبداللطيف]

يحلى الكلام وياك ثق ما أعوفك
لمن تجي يهواي وبعيوني اشوفك

[الدكتور اسعد النجار]

لمن تجي يهواي تحلالي دنياي

انسه الهضم والضيم من انته وياي

[الدكتور اسعد النجار]

يحله الكلام وياك ومناغتي ليك

بالليل يامحبوب والكلب تانيك

[عواطف عبداللطيف]

انسه الهضم والضيم لمن اراضيك
مكدر على فركاك بعيوني أغطيك

[حسن العلي]

مكدر على فركاك بحبك مسودن

عقب الثلاث أيام اطكن وأموتن

[الدكتور اسعد النجار]

عكب الثلثة أيام تتكطع احشاي

لو أشلع الدلال لو جيك مشاي