دارميات عراقية 2

[عواطف عبداللطيف]

لو اشلع الدلال لو أركض بساع
ليت الزمان يدور ويردني للكاع

[هديل الدليمي]

جافاني كَلبك حيل بس ما كرهتك
كـلما تــزيد صدود تـكثر مـعزتك

[الدكتور اسعد النجار]

كلما تزيد اصدود يزداد أحبك

شما تجرح الدلال اتمنه كربك

[هديل الدليمي]

غيب اشكثر متريد بعيوني رسمك
صح تبتعد وتروح بس كَلبي يــمّك

[الدكتور اسعد النجار]

صح تبتعد وتروح بس انته بالروح

ساكن يبعد جلاي والكلب مفتوح

[الدكتور اسعد النجار]

ريت الزمان يعود بيام الأفراح

نتناغة آنه وياك ونشد الجراح

[عواطف عبداللطيف]

نتناغة آنه وياك يابعد عيني
يمته تهل يفلان ويمته تجيني

[الدكتور اسعد النجار]

يمته تهل يفلان وتضوي دنياي

تسعد حياتي دوم وتعيش وياي

[عواطف عبداللطيف]

تسعد حياتي دوم وتهل الأفراح
أنسى الوجع والهم والگلب يرتاح

[الدكتور اسعد النجار]

تسعد حياتي دوم وتزول الأحزان

نعيش ابفرح وبخير بكل كتر ومجان

[الدكتور اسعد النجار]

راس السنه يهواي كون انته موجود

نحتفل آنه وياك والحزن ميعود

[هديل الدليمي]

نحتفل آنه وياك والحزن ثالث
يا عيد نفرح بيه والموت عابث

[الدكتور اسعد النجار]

ياعيد نفرح بيك آنه وحبيبي

لو هو لوماريد خيشح نصيبي

[هديل الدليمي]

لا عيـــد ينــفع بعد لا فرح يجــدي
راح العزيز وبقت ذكراه عندي

[الدكتور اسعد النجار]

راح العزيز ابعيد وظل حزني اليه

يازمن تالي وياك متحن عليه

[عواطف عبداللطيف]

يازمن تالي وياك شماتي شمات
يمته تحن وتدور الگلب ما مات

[الدكتور اسعد النجار]

يمته تحن وتدور مو دهري خوان

راواني كل الضيم اشكال والوان

[هديل الدليمي]

راواني دهري الضيم من كل الاصناف
وأحزاني كلها تصير بغيابك اضعاف

[الدكتور اسعد النجار]

أحزاني كلها اتصير ياحلو بالكوم

شلون غركت بهواك وآنه أعرف العوم

[عواطف عبداللطيف]

شلون اغركت بهواك وعيوني سته
شلت الشمع وياي وعلكت دسته

[الدكتور اسعد النجار]

شلت الشمع وياي جيت ارد أشوفك

آنه أدري كلش زين والله بظروفك

[هديل الدليمي]

لا تطلب الأفراح والدنيا ساعه
عمّرها بالإيمان وبكل قناعة

[الدكتور اسعد النجار]

عمرها بالايمان وابتهل لله

بالصدق والاخلاض نكضيها يله

[عواطف عبداللطيف]

بالصدق والاخلاص يعمر نبعنه
يكبر ويزهي دوم بيدينه كلنه

[الدكتور اسعد النجار]

يكبر ويزهي دوم نبع العواطف

الشعر بيه محلاه ومحله السوالف

[هديل الدليمي]

فراكَك ترسني هموم مـحد حـملها
والله من اشوفك جاي أنساها كلها

[الدكتور اسعد النجار]

والله من أشوفك جاي تتراجف اعضاي

ياترف شنهو الصار تتعارك اوياي

[عواطف عبداللطيف]

ياترف شنهو الصار مو موتتني
جنت انتظر ملگاك رحت وعفتني

[الدكتور اسعد النجار]

جنت انتظر ملكاك والكلب فرحان

اعلك صواني اشموع لو موعدك حان

[عواطف عبداللطيف]

اعلك صواني اشموع لمن أراضيك
لو عجزت الكلمات بعيوني احاجيك

[قصي المحمود]

لمن اراضيك اعلك صواني شموع
تشهده الشهكةوالتحفره الدموع

[الدكتور اسعد النجار]

دلالي أبد متصير بعد اله جاره

فد نوبه وجت بيه والهبت ناره

[عواطف عبداللطيف]

الجرح نز هواي مكدر على دواه
اشلون انام الليل متحيره وياه

[الدكتور اسعد النجار]

اشلون انام الليل والبدر غايب

أتناغه آنه وياه وأنسه الطلايب

[هديل الدليمي]

ويـن الـوطن يـا نـاس دلـوني دربــه
مسجونه صار اسنين بديار غربه

[الدكتور اسعد النجار]

وين الوطن ياناس أمشي وناشد


ضاع ابوسط سراق هذا الله شاهد

[هديل الدليمي]

صابر وصبري اليوم فاح من الضلوع
وعيوني بيها انهار سموها الدموع

[الدكتور اسعد النجار]

صابر وصبري اليوم ناشدني يمته

تتوافه ويه الزين وترجع فرحته

[هديل الدليمي]

مبدأ كلامي وياك صدق وصراحة
للـكذب ما خلّـيت درب ومسـاحة

[الدكتور اسعد النجار]

مبدأ كلامي وياك ياترف مكشوف

طول العمر أتناك والكلب ملهوف

[عواطف عبداللطيف]

طول العمر أتناك من كلشي محروم
والگلب صام وتاب من كثر الهموم

[الدكتور اسعد النجار]

طول العمر اتناك مامل ولاضوج

مابطل الحسرات كلبي بكه يلوج

[ابراهيم الغراوي]

لـو صـادق أنت ويــاي *** جــا ريحتني
مـا بين هـاي وذيـــج *** حـاير عفتني

[الدكتور اسعد النجار]

مابين هاي وذيج ظليت حاير

لاواكع وارتاح ولاآنه طاير

[عواطف عبداللطيف]

لا راكع وارتاح وكليبي ينساك لا أكدر أنسى الضيم وأبقى بلياك

[ابراهيم الغراوي]

مــو هينه عندي بساع ** وانسه النسوني
مـو بيّه هـذا العيب ** بالخلفــوني

[الدكتور اسعد النجار]

مو بيه هذا العيب بالمشوا وياي

طلعوا دغش ياصاح ضربوني بحشاي

[هديل الدليمي]

مــو هينه عندي بساع ** وانسه النسوني


مـو بيّه هـذا العيب ** بالخلفــوني


ههههههههههه
وكيف يعد الوفاء عيبا
راقت لي كثيرا

[هديل الدليمي]

عمري كَضيته بضيم ما شفت فرحه
والكَلب من فركَاك ما طاب جرحه

[الدكتور اسعد النجار]

الكلب من فركاك بس يون وينوح

مية مرض بالروح والصوت منبوح

[هديل الدليمي]

أكتب وافكر بيك عن بالي متروح
فوك السطر نسمات من عطرك تفوح

[الدكتور اسعد النجار]

أكتب وفكر بيك يحليو يسمر

ابحبك يبعد الروح كلبي تمرمر

[عواطف عبداللطيف]

ابحبك يبعد الروح احزاني كومة
والگلب من فركاك زادن همومه

[هديل الدليمي]

الكَلب من فركَاك ما ينبض هواي
والحالــه صعبــه تـصير من تزعل وياي

[الدكتور اسعد النجار]

الكلب من فركاك بس يهذي باسمك

وبكل وكت يهواي انظر الرسمك

[عواطف عبداللطيف]

الگلب من فركاك حيَّر زماني
الوجع تالي الليل هدني ولواني

[الدكتور اسعد النجار]

الوجع تالي الليل شل فكري واعضاي

عذبت روحي هواي كل هذا برضاي

[ناظم الصرخي]

لا تظن حي وانساك يـلـمنـبـعـك درْ
ترتعش كل اعضاي من ذچرك يمر

[عواطف عبداللطيف]

ترتعش كل اعضاي لمن تجيني
انت الگلب والروح يابعد عيني

[ناظم الصرخي]

أشبعد وشخليت؟ تنغط يالغـراب
تنذچر ماتنشاف خليت الاحباب

[عواطف عبداللطيف]

ينذچر ما ينشاف قرب الأحبة
بلكن يحن اليوم والهادي ربه

[عطاء محمد]

حنيت الك مرات وانت ولاتحن
ذابت الروح اعليك وكلليبي منجَّن

[ناظم الصرخي]

حنيت الك مرات چن حنة النوگ
ماصدگت ترتاح من آنه مخنوگ

[ابراهيم الغراوي]

الف انعم الله عليك تنغط يا الغــراب
جي ذكريت فــلان ناسيلـه أحباب

[ابراهيم الغراوي]

مـا أحن مو بطران بس عندي اسباب
ليش من أمـر عليك ما تفتح الباب

[ابراهيم الغراوي]

أنت صـدك مخنـوك لو هـذا ملعـوب
اتريد أصـدك بيك تجـويني انــوب

[عطاء محمد]

نوبة الزم الشباك نوبة افتح الباب
اني تعبت يهواي موكافي الغياب؟

[الدكتور اسعد النجار]

بلكي يحن اليوم ولفي وراويه

كل الفرح ياناس بيدي اداويه

[الدكتور اسعد النجار]

ذابت الروح عليك والكلب لايج

من غبت حد اليوم صدكني ضايج

[الدكتور اسعد النجار]

ماصدكت ترتاح من آنه انضر

لجلك تلفت الروح وكلبي تمرمر

[الدكتور اسعد النجار]

آنه ا تعبت يهواي بسك تجافي

أرد أكصد العباس ومشيله حافي

[هديل الدليمي]

غرّكَني دمع العين حسبالي طوفان
ليل ونهار أبجيك والكَلب ولهان

[الدكتور اسعد النجار]

ليل ونهار ابجيك ياحلو الأوصاف

لاانته مني كريب ولاانته تنشاف

[عواطف عبداللطيف]

لا انته مني كريب ولا اكدر بلياك
واچمالة فوك الهم گلبي مينساك

[هديل الدليمي]

ما اريد منك مسج كافي رسايل
بغيابك الحسرات عملت عمايل

[الدكتور اسعد النجار]

اجماله فوك الهم بيك آنه مشغول

والدمع علوجنات دايجري اسيول

[الدكتور اسعد النجار]

بغيابك الحسرات مردن دليلي

ياترف كافي عاد انهدم حيلي

[عطاء محمد]

حاير دليلي وياك يامنية الروح
صبح ومسى يهواي عن بالي متروح

[الدكتور اسعد النجار]

صبح ومسه يهواي متغيب عني

انت الضوه للعين ونور التمني

[هديل الدليمي]

إنت الضوه للعين من شمسي تغرب
وحروفك الحلوات للروح تطرب

[الدكتور اسعد النجار]

بحروفك الحلوات الكه السعاده

و كلبي يبعد الروح يلكه مراده

[هديل الدليمي]

حلمانه بيك اليوم والشوكَ طافح
بسّك غياب ارجوك ملّيت اسامح

[الدكتور اسعد النجار]

بسك غياب ارجوك بعدك سكمني

خلاني بس عظام والون كتلني

[هديل الدليمي]

الروح من تشتاق تنسى المسافات
وترفرف الملكَاك مثل الحمامات

[الدكتور اسعد النجار]

الروح من تشتاك تتمنه ملكاك

لو جنت بالمريخ تتناغة وياك

[هديل الدليمي]

لو جنت بالمريخ هم أحجي ويّاك
عالنيت بالمنتدى وبالفيس حيّاك

[الدكتور اسعد النجار]

لو جنت بالمريخ أصعد وجيلك

برويحتي يهواي والله أشيلك

[هديل الدليمي]

شافت عيوني هواي ماكو احلى منك
حتـى الجمـال بـشــوق يـحجيلي عـنــك

[الدكتور اسعد النجار]

شافت عيوني اهواي بس انت لحله

بكلبي يبعد الروح تبكه انت الأغله

[هديل الدليمي]

كَالولي حبّك وهم غيمه وتعدّي
ما دروا كلّ العشك من عنده يبدي

[الدكتور اسعد النجار]

كالولي حبك وهم كلت انتو شمات

كلبي عليل وبكه من دون دكات

[عواطف عبداللطيف]

كالولي حبك وهم ثاري ميدرون
هو الگلب والروح ونبض العيون

[هديل الدليمي]

قاسي وتراك هواي لوّعت جبدي
إهجر كثر متريد مو مهم عندي

[الدكتور اسعد النجار]

هو الكلب والروح وجلاي كلها

متشابكه بهواك ياهو الليفلها

[الدكتور اسعد النجار]

اهجر كثر متريد اتعودت انه عليك

كم مره طحت ابير وماتمد ايديك

[عواطف عبداللطيف]

كم مرة طحت ابير ايدك ما مديت
رحت بعدت لبعيد واچمالة صديت

[الدكتور اسعد النجار]

رحت ابعدت لبعيد ودلالي ابنار

ماتدري من فركاك شنهو الجره وصار

[عواطف عبداللطيف]

ما تدري من فركاك همي لواني
اسأل عليك الناس مدري شجاني

[الدكتور اسعد النجار]

أسأل عليك الناس والكلب موجوع

ماحصلت أخبار ظليت مفجوع

[هديل الدليمي]

ما حــصّلت أخــبار منـــك يـــغايـــب
ناشدت كل الناس حتى الكَرايب

[الدكتور اسعد النجار]

ناشدت كل الناس شمات وأحباب

عنك يحلو الطول كالوا تره غاب

[هديل الدليمي]

عنــك يحلــو الطــول حزنــي أصــدّه
بدرع المحبه احميك بس كَلبي ردّه

[الدكتور اسعد النجار]

بدرع المحبه أحميك ياحلو الاطباع

تميت ادور عليك والكلب هم ضاع

[هديل الدليمي]

تمـيـت ادور عـليــك بين المــتاهات
خلصت تراها الروح والأمل ما مات

[عواطف عبداللطيف]

خلصت تراها الروح وآنه بمكاني
ضيم وهضم واوجاع والهم تناني

[الدكتور اسعد النجار]

ضيم وهضم واوجاع عشت بغيابك

ودموعي علوجنات تحله برضابك

[عطاء محمد]

دمعاتي مثل السيل يجرن على الخد
وانت بربيع تعيش ماهمَّك أحد

[الدكتور اسعد النجار]

انته بربيع تعيش وانه بخريفي

معرف شتايه شلون ومعرفت صيفي

[عواطف عبداللطيف]

معرف شتاي اشلون تعبني الغياب
منتظرة ريح الشوگ من نفتح الباب

[الدكتور اسعد النجار]

منتظر ريح الشوك تحملها وياك

ونسكت الشمات ياترف وعداك

[هديل الدليمي]

لــعيونك الـحلوات أكــتب قصيـــده
من دمّي اخطها حروف تصرخ أريده

[الدكتور اسعد النجار]

لعيونك الحلوات أركص وأغني

بس الك يامدلول يحله التمني

[عواطف عبداللطيف]

بس الك يامدلول حروفي تجري
تطفى الجمر بحشاي ويزول قهري

[الدكتور اسعد النجار]

تطفي الجمر بحشاي حروفك يغالي

ابجيتك يامدلول ينسعد حالي

[هديل الدليمي]

هاك الــعمر صوغات وانـطيني لحظه
بيها ارد اضمّك حيل وبموتي أرضى

[الدكتور اسعد النجار]

أرد آنه أضمك حيل وشفي غليلي

والكه السعاده وياك واروي دليلي

[هديل الدليمي]

ما أحجي آنـــه وياك زعـــلانه مـــنك
كَاضيها كله غياب صالحني فنّك

[عواطف عبداللطيف]

گاضيها انت غياب وتگلي إنتِ
اچماله ريح الشوگ طفت شمعتي

[الدكتور اسعد النجار]

ماأحجي آنه وياك ولاريد أشوفك

كلمة شقه يهواي مكدر أعوفك

[الدكتور اسعد النجار]

اجماله ريح الشوك عذبت دليلي

واتذب عليه الصوج مو تعب حيلي

[هديل الدليمي]

تغيب وتكَلّي اهواك واشتاق الك دوم
لا جيّه لا مـيـعاد كَاضيــها بـس نــوم

[الدكتور اسعد النجار]

جيتك يحلو الطول بس انته غايب

هو اليحب ياصاح ينسه الحبايب

[عواطف عبداللطيف]

اتذب عليه الصوج والردته ردته
شحچي شكول للناس والصوج انته

[هديل الدليمي]

هاك الدمع غمدات والكَلب جيبه
من كثر ما ونيت طلعتلي شيبه

[عواطف عبداللطيف]

من كثر ما ونيت ونَّي لواني
لابيه اسكت عاد لابيه اتاني

[الدكتور اسعد النجار]

شحجي شكل للناس ملوا كلامي

والسهر بس وياي حرم منامي

[الدكتور اسعد النجار]

لابيه أسكت عاد لابيه أحجي

مو خلص كلبي وكام بس هو يبجي

[هديل الدليمي]

عالركبة اجيك زحوف وبحضني ادفّيك
أنعـــــل أبـــــو البجّاك لابــــو اليجافــــــيك

[الدكتور اسعد النجار]

عالركبه اجيك زحوف وبكلبي اضمك

انت الورد يهواي كلسا أشمك

[الدكتور اسعد النجار]

أنعل ابو البجاك يابعد عمري

كافي هجر يهواي موخلص صبري

[عواطف عبداللطيف]

كافي هجر يهواي تريدك الروح
والگلب من فركاك لساته مجروح

[الدكتور اسعد النجار]

الكلب من فركاك عايش بالهموم

يمته تجي يهواي وتسكت اللي يلوم

[عواطف عبداللطيف]

يمته تجي يهواي واشعلك شموع
تنسيني كل الراح وتمسلحي الدموع

[الدكتور اسعد النجار]

تنسيني كل الراح من تجي يمي

ماتبكه بيه اجروح ويزول همي

[عواطف عبداللطيف]

ما تبكة بي جروح يالرايد تروح
انت إلي دنياي وانت إلي الروح

[الدكتور اسعد النجار]

انت الي دنياي انت احلى الأيام

لو غبت عني يوم تزداد الآلام

[عطاء محمد]

آلآمي بيك تروح ياحلو الرسوم
احلى السلام اهديك والورد كل يوم

[الدكتور اسعد النجار]

أحله السلام أهديك يامنية الروح

يمته تجي يهواي وتطيب الجروح

[عواطف عبداللطيف]

لو غبت عني يوم يكبر ونيني
انت الدوة للروح يابعد عيني

[الدكتور اسعد النجار]

انت الدوه للروح و لجروحي بلسم

بضحكاتك الحلوات يزهر المبسم

[عواطف عبداللطيف]

يمته تجي يهواي وبعيني اشوفك
تدريني كلش زين ماكدر اعوفك

[الدكتور اسعد النجار]

تدريني كلش زين ياحلو الأطباع

كلبي يحن عليك للوفه ماباع

[عواطف عبداللطيف]

گلبي يحن عليك ومن همي شحچي
ظلمه يا ضي العين بس أحچي ابچي

[الدكتور اسعد النجار]

ظلمه يضي العين دنيايه بعدك

ومساهرالأيام أنتظر ردك

[عطاء محمد]

ظلمه وتعاني الروح من برد الايام
والوطن هالمجروح وعيوني متنام

[عطاء محمد]

مذبوح الوطن باعماقنا نضمَّه
ورد وياسمين ترابه ونشمَّه

[الدكتور اسعد النجار]

ظلمه وتعاني الروح من بعد الأحباب

بس دمع بس ونات من همه غياب

[هديل الدليمي]

لا تــدّعي الإخـلاص بـسّك تـــملّق
خاين وفه ما بيك والكَلب فندق

[حسن العلي]

فندق إلك يفلان قلبي تريده

تدلل إنت هواي بس حبنا عيده

[هديل الدليمي]

خليلي سم بالجاي صدكَني اشربه
بس لا تــغيب بيــوم فركَتك صعبه

[الدكتور اسعد النجار]

عيبتك حلو الطول غيرت أحوالي

كلسا تشب النار وتحرك ذيالي

[حسن العلي]

تحرق أذيالي لي يابعد أخيك

وتدريني كلش زين مقدر أملك

[الدكتور اسعد النجار]

تدريني كلش زين يابعد روحي

ليلي تره بعداك أكضيه بنوحي

[علي عبدالحسن]

يا كصره هاذ اللــــــيل من اكعد اوياك
وشطوله ليلي ايصير لو مرعلى جفاك

[ابراهيم الغراوي]

ما شلت عيني عليك من مستحى الـذات
خـافن تظن ناسيك لا بويه هيهـات

[عواطف عبداللطيف]

خافن تظن ناسيك وتشمت عداي
إنت إلي دنياي وإنت إلي الماي

[الدكتور اسعد النجار]

اشطوله ليلي ايصير لو غبت عني

وتهل دموع العين ويزيد وني

[الدكتور اسعد النجار]

انت الي دنياي ماعندي غيرك

ا بكلبي احطك دوم وكلساعه اديرك

[هديل الدليمي]

ليش انت كَاطع حيل وبشوكَي عالم
مــــو دمّرتـنـــــي غـيـاب بسّــــك يــظالم

[علي عبدالحسن]

شما شـــده تكطع ليش حبل الموده
كلشي بعشرتك ليش صايرلي شده

[الدكتور اسعد النجار]

غيابك يحلو الطول أذاني والله

اتنخه طول الليل ربالي عله

[عواطف عبداللطيف]

اتنخه طول الليل بلكي تجيني
من كثر ما ظليت ارمدت عيني

[الدكتور اسعد النجار]

من كثر مازنيت عشت آنه موجوع

جفت اعيوني عاد والكلب مفجوع

[هديل الدليمي]

يا غايب على العين مر بمسيّه
واخذ الغرام وياك بسّك أذيه

[الدكتور اسعد النجار]

أخذ الغرام وياك وشوف الحجي زين

مابكه بيه حيل ولادمعه بالعين

[حسن العلي]

والحكي يامزيون تعرف معانيه

والقلب شظل بيه وأنت تلاويه

[هديل الدليمي]

من روحي اخذ بوسات ومن عيني دمعه
يــــوم الأريــــد انساك كَلبي أشلعــــه

[حسن العلي]

كل شئ يجي بالهون
أصبر يحلو عيون

[الدكتور اسعد النجار]

يوم الأريد أنساك اكطع وريدي

من الله حبك جاي والله مو بيدي

[قصي المحمود]

يدنية ليش بعذابي دوم تسعين
كافي من المهد تريدهه للتسعين

[عواطف عبداللطيف]

من الله حبك جاي وآنه شبيديه
گلبي يريدك دوم بس حن عليه

[هديل الدليمي]

خـنت الملح والزاد خـنت المحبـه
الله اليسامح روح كلمن بدربه

[الدكتور اسعد النجار]

الله اليسامح روح يلخنت بيه

انته سكنت الروح كلي شبديه

[الدكتور اسعد النجار]

كلبي يريدك دوم يلساكن الروح


والكلب من فركاك دتشوفه مجروح

[عواطف عبداللطيف]

والگلب من فركاك شنهو اليسكته
شحجي شكول للناس والرايح انته

[الدكتور اسعد النجار]

شحجش شكا للناس مو علتي عله

كلبي يظل مجروح جيه عافه خله

[عواطف عبداللطيف]

گلبي بقى مجروح لمن عفتني
شنهو الجرة وشصار مو مرمرتني

[الدكتور اسعد النجار]

شنهو الجره والصار ياولفي كلي

كلبي بلهيب النار موكافي خلي

[عطاء محمد]

كافي عتب يهواي يابعد هالروح
كلماتك الحلوات عن بالي متروح

[هديل الدليمي]

يالناوي عنـــي تــــروح روح الله ويّاك
بس لا تظن بيوم راح اكَدر انساك

[الدكتور اسعد النجار]

كلماتك الحلوات بكلبي زرعتهن


تفرح يبعد الروح بس لو شفتهن

[الدكتور اسعد النجار]

بس لاتظن فد يوم ولفي آنه اعوفك

من عمري يبقه يوم اطلب اشوفك

[هديل الدليمي]

كَالولي مثل الكَمر يضوي بزهاته
هــــوّ الكَمر يا ناس يشـــــبه حلاتــه

[الدكتور اسعد النجار]

هو الكمر ياناس ماكو أحله منه

بعيونه الوسعات شفت آنه جنه

[عطاء محمد]

جنة الحياة تصير يوم الأشوفك
لاتضن يامحبوب فد يوم اعوفك

[الدكتور اسعد النجار]

حلوة الحياة اتصير من تجي يمي

دمعاتي كلها اتروح ويزول همي

[الدكتور اسعد النجار]

لاتظن يامحبوب فد يوم انساك

افرح واغني دوم من يمر طرواك

[هديل الدليمي]

كل يوم اكَولن يمر بس انت ما جيت
روحـــي بغيابـــك تـــون يا شمعـــة البيت

[الدكتور اسعد النجار]

روحي بغيابك تون ياأحله شمعه

ردتك تجي يهواي وأمسح الدمعه

[الدكتور اسعد النجار]

كل يوم اكولن يمر ولفي وأشوفه

ويروح عني الحزن والهم أعوفه

[هديل الدليمي]

كَضّيت عمري بهجر والغربه علقم
لا حـن عليـّــه الـــوطن لا مــوتي يرحم

[الدكتور اسعد النجار]

كضيت عمري بهجر وكلبي غده نار

واللي أحبه ابعيد وخلاني محتار

[الدكتور اسعد النجار]

لاحن عليه الوطن لاولفي الي عاد

كافي بعد ياصاح كافي هجر عاد

[عواطف عبداللطيف]

كافي بعد ياصاح كل عذر ماريد
كلشي نسيته بساع حتى المواعيد

[الدكتور اسعد النجار]

كلشي نسيته ابساع جيه آنه أحبك

واتمنه أعيشن دوم وسعد ابكربك

[حسن العلي]

يا يــوم افــز والگـاك متــوســــــــــــد ايــدي
ولـو صــدگـ صــارت هــاي صدگنــي عيــدي

[هديل الدليمي]

حسّبـت كلشي وياك إلا الخيانـــة
نطيتك نبض واحساس وبكل أمانة

[حسن العلي]

لا ألو لاترميش لا منك اخبار== ردنه خمس سنتات ماردنا دولار

[حسن العلي]

أحبك أكثر من سكان الصين وعدد قواطي البيبسي بالدكاكين وأزمة الكاز والبنزين

[حسن العلي]

من قلبي أجر أسلاك حتى أتصل بيك فدوه الرصيد يروح بس كون أحاجيك

[الدكتور اسعد النجار]

صوتك يحلو الطول كون آنه اسمعه

ودربك أزرعه ورود وبيدي أذرعه

[حسن العلي]

مجبور ادك ارقام تجبرني إيدي دم قلبي أخلصه عليك موبس رصيدي

[الدكتور اسعد النجار]

وبشارع الأحباب رحت آنه أمشي

ملكيت بس برغوث رشيت أمشي

[عواطف عبداللطيف]

دربك ازرعه ورود يابعد عيني
بدم الكلب أسكيه بس لو تجيني

[الدكتور اسعد النجار]

بدم الكلب أسكيه وردك يولفي

ابروحي تشب النار وانته التطفي

[الدكتور اسعد النجار]

بالعيد اجيت اهديج بوسه وتحيه

موش انتي الله انطاج النه هديه

[ابراهيم الغراوي]

لا زحمة حـد البوس شو وصلتهـا ؟
ثكلت علي يسعود جــا بدلتها

[هديل الدليمي]

لا.. لا تلوم الروح لو حنّت بـــعيد
وارسلت ويه الشوق بوسه وتغاريد

[الدكتور اسعد النجار]

يحله يخويه البوس بين الحبايب

ياخويه يبراهيم ليش انته غايب

[الدكتور اسعد النجار]

لالاتلوم الروح فرحانه وياك

تنسه الحزن والضيم ويسعدها ملكاك

[الدكتور اسعد النجار]

ارسلت ويه الشوك باكات الورود

وانطيك لو موجود بوسه من الخدود

[الدكتور اسعد النجار]

البوسه يبراهيم للأم تره نور

مثل الكمر ياصاح اتلالي وتنور

[عواطف عبداللطيف]

بروحي تشب النار بدمي تجري
مدفونه بيك سنين ما جنت ادري

[الدكتور اسعد النجار]

مدفونه بيك اسنين روحي يغالي

ردتك تجي وتشوف اشجره بحالي

[هديل الدليمي]

من كثر ما أشتاق يعجز كلامي
عـن وصف ما عانيت بــغيابـك آنـي

[الدكتور اسعد النجار]

بغيابك آنه الليل الليل أسهر وباري

للدرب بلكي تعود والدمع جاري

[ابراهيم الغراوي]

تنشد علي يسعـود **** ما تدري بالحــال
دلالي راح ويــاه **** خلانــي وشــال

[الدكتور اسعد النجار]

أدري يخي بالحال واعرف ظروفك

اتمنه يبراهيم بلخير اشوفك

[هديل الدليمي]

تـدري آنـه بـالدلال بــيتك بــنيته
دفّيته بالإحساس، بالحب سبيته

[الدكتور اسعد النجار]

تدري انته بالدلال مقعد حجزته

وحبك يبعد الروح بكلبي حملته

[عواطف عبداللطيف]

حبك يبعد الروح خلاني مجنون
من ضحكة العذال غمضت العيون

[الدكتور اسعد النجار]

من ضحكت العذال كمت أمشي بهداي

خافن أطيح النوب تشمت اعداي

[عواطف عبداللطيف]

خافن اطيح النوب وينتفخ چبدي
شلي غرض بالناس بس انت عندي

[الدكتور اسعد النجار]

شلي غرض بالناس كلمن ابدربه

أهواك واتمناك والفركه صعبه

[هديل الدليمي]

الروح حنّت إلك والكَلب محتار
ولــــو خيروني هلي ما غيرك اختار

[الدكتور اسعد النجار]

داريتك امداراة مي بالصواني

هاوكع مني طاح هارد اجاني

[قصي المحمود]

شلتك جوه الهدب
اخاف اغمض العينين
كلت مو يمي جذب
فضحتني دمع العينين

[الدكتور اسعد النجار]

لو خيروني هلي مافاركك دوم

اتناغه آنه وياك كل ساعه كل يوم

[قصي المحمود]

لو خيروني هلي وياه جبل لوم
اتناغه آنه وياك كل ساعة ويوم

[الدكتور اسعد النجار]

لاتصفن يحجي العوز صار استاذ

وغصبن ماعلينه انصير طلابه

[عامر الحسيني]

مالي غرض بالناس انت الأحبه
بسك يبعد الروح قلبي تذبه
http://imagecache.te3p.com/imgcache/22b6bf99a6fd17fc58878c178a4488a2.gif

[الدكتور اسعد النجار]

أرد أسأل الصوبين عنك يغالي

يرضون انته ابهاي تعذب احوالي

[سعد السعد]

الساعة نص الليل ....والدنيا سكته
كلما أشوف انجوم ....عبالي انته

[الدكتور اسعد النجار]

مو كلمن ضحك تحكم عليه فرحان

البلابل بالقفص من ضيمها تغرد

[عواطف عبداللطيف]

البلابل بالقفص تسأل عليك
والچرة بيه تره كله من ايديك

[عواطف عبداللطيف]

كلما اشوف انجوم أسألها عنك
تدري انت كل الصار مو مني منك

[سعد السعد]

انت الذي اختاريت مركب جفانا
وتذب عليّ السوج تعلاكة آنه

[الدكتور اسعد النجار]

أسأل عليك اهواي بس أنت بد ذات

وبفركتك يهواي فرحت الشمات

[عواطف عبداللطيف]

انت الذي اختاريت مركب جفانا
وتذب عليّ السوج تعلاكة آنه

اتذب علي السوج يالساكن الروح
من قسوتك يهواي الگلب مجروح

[عواطف عبداللطيف]

أسأل عليك اهواي بس أنت بد ذات

وبفركتك يهواي فرحت الشمات


من فركتك يهواي عيني على الباب
انطر يجي مرسال ييبينلي الاسباب

[الدكتور اسعد النجار]

من قسوتك يهواي شماتي فرحت

وروحي يبعد جلاي من الحجي انجرحت

[عواطف عبداللطيف]

روحي يبعد جلاي هدها الزمن هد
جرح اللي بي چبير ووليفي ما رد

[الدكتور اسعد النجار]

جرح اللي بيه اجبير منه اليداويه

لو ولفي اليه عاد جم جرح اراويه

[الدكتور اسعد النجار]

لاتظن يوم انساك لو يوم اعوفك

صدكني ابيع اجلاي بس اكون اشوفك

[عواطف عبداللطيف]

صدكني ابيع جلاي بس حتى اراضيك
من گلبي اسمع صوت من يجي طاريك

[سعد السعد]

صدّكَني ما ناسيك واشلون أنسى
لو انته ما موجود لا ماكو ونسه

[الدكتور اسعد النجار]

من كلبي أسمع صوت كلما أشوفك

وتسألني يامحبوب خافن أعوفك

[الدكتور اسعد النجار]

لو انته ماموجود ارحل وسافر

وابكه العمر يهواي بس الك ناطر