حسنة ام اللبن

[سعدون المسعودي]

عدنه شلون دوله وبيها حرية..!
حسنة ام اللبن صارت سياسية
حسنة شلون لعبت بالخلگ طوبة
راحت للسياسة وعافت الروبة
الفضائيات كلها عليها مگلوبه
وامريكة ياربي بيها مسبيّة
حسنة ام اللبن صارت سياسية

حسنة لفلفت كلشي بعبايتها
وسبعتالاف من تمشي حمايتها
بسوگ العورة متشكلة وزارتها
وحكومتها حكومة محو اميه
حسنة ام اللبن صارت سياسية

طلابتنا چبيره وحسنة حبابة
وبوش يگول هي تحل الطلابة
حسنة للحكم صعدت بدبابة
وگامت ترسملنه خطط امنية
حسنة ام اللبن صارت سياسية

ياناس على حسنة بعد مانعتب
لان مگرودة لا تقره ولا تكتب
ملتهية تفرهد بينه وتسلّب
وحصتها بنفطنه ألف بالميّه
حسنة ام اللبن صارت سياسية

ماندري ويه حسنة شلون تاليها
ياناس وتعبنة من بلاويها
لان دولتها حاميها حراميها
حظنه الوگعانه بحلگ واوية
حسنة ام اللبن صارت سياسية

گالوا حسنه راح تعالج الاحباط
وتذب شيلة فگرها وترد تلبس قاط
وتأسس حكومة كلها تكنوقراط
وتعالج بناء البنى التحتية
حسنة ام اللبن صارت سياسية

لبست قاطها وتسودنة حسنة
وردّت تزمخ علينه وتفارسنه
درجعلي للبن مو خرب واهسنه
عساها بخت من سواچ حزبية
حسنة ام اللبن صارت سياسية

(منقول )

[مشتاق عبد الهادي]

الرائع سعدون المسعودي
هذا ما اسميه بالكوميديا الباكيه
قد اجدت باختيار المفردات
وكذلك باختيار الموضوعات المتناقضه
انت من الذين يجيدون لعبة الدمج بين الحرف والحدث
اشكرك ايها المبدع على هذا النص المميز
الذي ذكرني بنصوص الشعراء المبدعين
من امثال الملا عبود الكرخي
الذين حملوا الضحكة اعباء البكاء
دمت واتمنى ان اقرا لك المزيد

[عبد الرسول معله]

نقد ساخر لكل الأوضاع التي تمر بالبلد المنكوب

وأنا أعذر حسنة لأنها أمية أتعبها الفقر وحين استلمت السلطة حاولت أن تحصل على كل شيء قبل أن يدور الزمن

فما بالك بألف حسنه وحسن وهم يحملون الشهادات العليا ويقومون بالسرقات بحجة الامتيازات والرشاوى الخفية

أكثر علينا مثل هذا الشعر فهو من أفضل عوامل تنبيه الشعوب إلى ما يدور في دهاليز السلطة وقبة البرلمان

تحياتي ومودتي