أبوذيات قلعاويه / للشاعر علي كاظم درجال

[علي الربيعاوي]

والطمامه
انه الراضع لبنكم ** والطمامه
وانه النمام اسطره ** والطمامه
تريد انسه المنازل ** والطمامه
وهن جهلي وصباي وتاج اليه
**
والترابه
انه مرافك ضعنكم ** والترابه
وعتابي وي المعدل ** والترابه
يهل ساكن الجمشه ** والترابه
المسكن دبن والعيشه هنيه
**
عنبراني
انه مو شتل سمسم ** عنبراني
يفوح العطر مني ** عنبراني
محط السفن كلبي ** عنبراني
وانه الطيب الذات اخذ تحيه
**
والنوافل
وحك من صلى واجب ** والنوافل
عجد حبل الموادد ** والنوافل
انه الحشمت دارم ** والنوافل
يفزعولي ويحلون القضيه
**
كوشه
معزب اظن كلبي ونصب ** كوشه
وتحير غزل صيدي وصار ** كوشه
انه من زامطاني صحت ** كوشه
مصلصل والعكوسه شهود اليه
**
عكسه
انه ابرنو رماني موش ** عكسه
لأن يمشي بطريق اوامشي ** عكسه
تولاني ضرب بطراف ** عكسه
ولاخله عظم سالم خطيه
**
بيديراوي
انه الحاوي رطبكم ** بيديراوي
وانه المحد رواني ** بيديراوي
سألني ألأصل كتله ** بيديراوي
عرف بدراوي انه وخان بيه

[أحمد الدراجي]

جملية تلك الباقة التي جلبتها

لهذا اللون من الشعر الشعبي العراقي

مميزة بجناساتها التي لم تطرق قبل

لك التقدير

[علي الربيعاوي]

الاخ الاستاذ احمد الدراجي المحترم
شكرا جزيلا على هذا التعليق الجميل انها تولدت من اسماء مناطق جميله في مدينة قلعة صالح في ميسان / الطمامه / الجمشه / الترابه / ومسميات لبنادق قديمه مثل العكسه والبرنو / ونخوات لعشائر مثل كوشه وعشائر معروفه مثل دارم والنوافل والأبيدراوي ألكعبي ،،، تحياتي واحترامي

[سعدون جبار البيضاني]

الشاعر المبدع علي كاظم درجال الربيعاوي
محبتي
ابو ذيات جميلة جدا ورائعة
اتمنى لو تكتب مقابل كل جناس المعنى ليتسنى للقاريء معرفتها والتي تبدو اللهجة العراقية صعبة عليهم
خاصة الاخوة العرب واهديك هذا البيت

الدهر ما يوم ساعة فاتحالي (تركني)
ولا للفرح بابه فاتحالي (يفتح الباب )
عدل والناس تقره فاتحالي (سورة الفاتحة)
اذن موتي ووجودي اصبح سوية

[علي الربيعاوي]

ماجراني
انه الجريت حبلك ** ماجراني ( من السحب بمعنى سحبني )
وانه من جور دهري ** ماجراني ( من ألأذى والتألم )
سألني ألأصل كتله ** ماجراني ( من المجر الكبير )
عرف مجراوي انه وخان بيه
ــــــــــــــــــــــــــــ
شكرا للاستاذ الفاضل سعدون البيضاني على هذا المقترح وانا سعيد جدا لمرورك أستاذي العزيز ،،،، تحياتي
ــــــــــــــــــــ
علي الربيعاوي

[عبد الرسول معله]

ذوقك فيما تقدمه لنا جميل وممتع

وليتك تزيد من كرمك فتوضح الغامض منها

تحياتي ومودتي

[علي الربيعاوي]

عماره
من عسى بيت الهوى ماتم ** عماره ( من العمران )
ومن أ عمارنا يزيد ** عماره ( العمر المديد )
كتلني البلأصل يرجع ** عماره ( مركز محافظة ميسان )
عرفني انه عماري وخان بيه

شكرا لمرورك استاذي الفاضل ألمعله،،، تقبل خالص شكري وتقديري