أصيرلك

[حسن هادي الشمري]

أصيرلك ***

هايبو وجه ألحلو
وعيون ساعه
وماكو مثل عيونه عد
الساعـﭽـي
شتريد أصيرلك أصير
تريد أصيرلك وسادة
وتـﮕـعد بحضن الوسادة
وتنتـﭽـي
لو أصير دموع بعيونك
وأبوسك
حتى ما تبـﭽـي وأطيحن
بالبـﭽـي
لو تريد ورود أصيرن فوﮒ خدك
لو أصيرلك على أشفافك
حـﭽـي
والله مني المستحيل أطلب وأصيرن
تريد أصيرن همسه تصرخ
لو أصيرن صرخة تنـﮕـال
بهمس
تريد أصيرن أمس باﭽـر
تريد باﭽـر بيه أصيرلك
أمس
لو أصيرلك ﮔـمر وبنص نهارك
لو بنص ليلك أصيرلك
شمس
تريد أصيرلك عرس بعيون دمعه
لو أصيرن دمعة بعيون العرس
تريد اصيرن أخرس وﭽـلماته تحـﭽـي
لو أصيرن أحـﭽـي ﭽلماته
خرس
تريد أصيرلك كتاب وبيه تقره
لو أصيرلك كتاب وبيك أنا
أقره الدرس
كلشي التريده أصيرلك ... أصير
وما أريدك غير بس بيه
تحس
بيه تحس

[محمد الفهد]

اصيرلك
كلي أمر شما ردت تدري يصير
انت غير
وتدري كل الناس غير
تدري أنت معلك بسباح روحي
اكثر من الروح احبك
أكثر وتدري بجثير
تدري يابو خدود حلوه وعين ساعه
تعبتني شكد اعوذ
خايف يحسدونك والله القدير

الأستاذ / حسن هادي ألشمري
دائما نجد الجمال في صفحتك فيلهمنا
على الارتجال فاعذر تواضع حرفي
وتقبل خالص تحياتي

[حسن هادي الشمري]

الأستاذ محمد الفهد
شكرا" لمرورك ... وأطرائك الجميل والذي سيكون لنا
حافزا"للنشر لنتمتع بجمال ما ترتجل
من مقاطع شعرية رائعة كما أنت * تحياتي ومحبتي
ودمت بألف ألف خير