وطن مذبوح / الى الأستاذ عبد الرسول معله

[حسن هادي الشمري]

وطن مذبوح

الى الأستاذ عبد الرسول معله

والله هم البيه لو أطشه على الدنيا
فلا توسع تشيله
عيوني أحس بيها غريبه أوحشه عايش
مثل ( نجم أسهيل ) مستاحش
بليله
أشكثر بجني الليالي دموع من دم
مثل ما يبجي اليتيم التارسه أدموعه
شليله
والله أحس مكسوره روحي
مثل فارس منهزم أحصانه مخنوك
بصهيله
يمه تعبني الوطن وأذكر وصيتج
يوم كلتي الوطن مثل أعكال أبوك
وفوك راسي الوطن شيله
وكلتي خليني أحطه كحل فوك العين
لو أظفره ظفر وي الجديله
وريت أطفال العراق أتصير فراشات
وتطير بفرح وتحط على
ورود الخميله
يمه مات الحلم بعيون الزغار
والأماني الجنتي تتمنيها صارت
مستحيله
يمه عالوا عالوطن
وأدري الوطن مهيوب ما يحمل
العيله
يمه أحس مخنوك هذا الوطن
وانا أمجتفات أثنين أديه
وحيل ما بياش أكومن وأنتخيله
يمه تعبان الوطن زعلان أحسن بيه
يعت أبروحه عت مهدود
حيله
يمه مذبوح الوطن
وألي ذبح هذا الوطن زلم القبيله
يمه مذبوح الوطن
وألي ذبح هذا الوطن
زلم
القبيله

[سحر علي]

نكئت جراحنا بهذه الكلمات الحزينة
سلمت يمينك
وكل عام والعراق بخير

[حسن هادي الشمري]

تعبان يا هلوطن وأدري
الجروح أهواي
وأدري الي راح أشعمل
بس خايف أمن الجاي
أدريك ميت عطش . بس بيش
أروي العطش ؟
أمن العطش مات الماي
سيدتي سحر علي ...
شكرا"لمرورك وسلّم الله الوطن وسلمّك من الجراحات
وكل عام والعراق وأنت وكل العراقيين بألف ألف خير
مع أطيب تحياتي *******

[أمل الحداد]

روعة يا أستاذ حسن رغم أنها عبارة عن قهر
وتبجّي حتى الصخر
حسبنا الله ونعم الوكيل
والله أكبر ياوطنّا وأكبر من زلم القبيلة
تسلم أيدك وروحك يـ الطيّب
وكل عام وأنت والعراق بخير وأمــان
وتحياتي لك وللأستاذ عبد الرسول
"

[حسن هادي الشمري]

تعبان يا هلوطن وأدري
الجروح أهواي
غنيت من الوجع موال
بهجه وفرح
من شاف بيك الحزن
مات اللحن بالناي
بعيوني أشكد بجي
بس وين ألكى الصدك
عالوطن يبجي أوياي ؟
سيدتي أمل الحداد ...
يؤلمني أن أقرأ في صفحتك
الأقامة ( هنا ..... وهناك )
أرجو أن تغيريها الى ( أحضان الوطن )
لا أبكى الله عيون الوطن وعيونك وعيون
كل العراقيين الطيبين ... وكل عام وأنت
والعراق بألف ألف خير وتحياتي لك وللأستاذ
عبد الرسول ودمت بخير *****

[أمل الحداد]

سمعًا وطاعةً أستاذي النبيل
غيّرتُ مكان إقامتي الى (أحضان الوطن)
علّ الوطن يسامحنا ويلملم بعثرتنا
وتلتقي أجسادنا الـ هنا بأرواحنا الـ هناك
"
وشكرًا لك ولمشاعرك النبيلة
حماك الله ورعاك سيدي
مع تقديري واحترامي الكبيرين
"

[حسن هادي الشمري]

كافي مليتن بجي
وأشكد كحل نكط على الدم
كافي ... يمته أتحنن أبريسم
شعرجن
ويمته يا (مشط الخشب )
بخصلاته أترد أتشيم
ويمته أتعطرن شيلجن بالمسج
وريح الوطن بهدومجن
لو لذتن أبسدنا مثل طير الحباري
أنكوم نشتم

أنتظري قصيدتي ( دموع وكحل )
الى المرأة العراقية التي حملناها
ما لم تتحمله أمرأة أخرى .
شكرا" لك سيدتي على تغيير العنوان والوطن ***
كريم ومسامح وأنشاء الله سيلتم الجميع في أحضانه
تحياتي وتمنياتي لك بالسعادة الدائمة وألى الملتقى
في عراق المحبة

[وطن النمراوي]

للأسف، و رغم صعوبة الواقع فهي الحقيقة أن بعض و ليس كل زلم القبيلة هم من ذبحوه فهناك الملايين التي فدته و ما زالت تفديه بدمائها

سلمك الله أستاذي حسن و عيدك مبارك و كل عام و أنت بألف خير
نعم ما أهديت و إن كانت مثخنة بالحزن
و نعم من أهديته هديتك الجميلة هذه
سيسعد بها جدا أستاذي عبد الرسول
و من كريم لكريم تأتي الهدايا جميلة
لكما تحياتي و تقديري
و إكراما لكما و لحرفك الجميل و لعراقنا الأشم أثبتها
ثبتنا الله جميعا على محبته و طاعته و حب العراق

[وطن النمراوي]

و نسخة منها إلى قسم هدايا الكرام

[محمد الفهد]

يا وطن توكف العقل لو مريت علبال
وبذكرك صدك جن آنا مشلول
ما تكدر توصفك
حيره الأقلام
ولو ردت انه أوصفك شكتب فصول
بس جلمت احبك
ترست أكتاب
بعد كل الكتب لا تقره منقول

القدير حسن الشمري
كما عهدتك أخي بحروفك الرائعة
تحياتي لك َ
وتمنياتي بعام سعيد لك َ وللأستاذ / عبد الرسول معله
تقديري

[حسن هادي الشمري]

يا وطن والله تعبنا
بيك ضيعنا العمر وسنينه
والله ملينا البجي
مدري نبجي أعليك ...
لو تبجي علينه
ليش من دون الأوطان
و ليش من دون الشعوب
أشبينه
الناس فرحانه بوطنها
وأحنا بس الموت ياكل
بينه
صديقي العزيز محمد الفهد ...
شكرا" لمرورك الجميل ومقطوعتك
الرائعه التي جعلتني أرتجل هذه الحر وف
البسيطه أرجو أن تنال رضاك .........
عيد سعيد وكل عام وأنت والعراق
وكل العراقيين بألف خير .مع أطيب التحيات لك
وللأستاذ عبد الرسول ودمتما سالمّين