ما أريد الناس تسمع بالونين

[محمد الفهد]

الــراح راح وبعد ما أرجى يجي
مثل مـــــــاي تبده مــــا يلم محال
ما يرد لو تشعل ألعشره الشموع
ولا يجيبه أنحب ولا جابه السؤال
نجمه ضاعت مني ما بين النجوم
وأنا أعمى وحتى ما شوف الهلال
يا بخت متعثر شما كــــــظ عليه
مثل يزحف راد يصعد عالجبال
لا رجل عدي والحکک يا زمان
وبتره أيديه وأنا بسوح القتـال
يا زمان الراح شبسرعه وغديت
مو حقيقه.جن حلم راح وخيال
ستكثرت افرح وبجيت العيون
أنا زاعلت الفرح من هو شال
يا زمان الراح ما اعتب عليك
بسكته أنا أحترک ما تسمعلي کال
مــــا أريد الناس تسمــــــع بالونين
جا تفسر لو صخر کلبي وجبال






محمد الفهد

[عواطف عبداللطيف]

أشلونة أضمه للونين والگلب من بعده ذاب
والحزن هالة على عيني والعمر كله عذاب
والفرح غادر دربنة والگمر همينة راح
والدمع رافك دربنا من المسا حنى الصباح
لا تكلي ما أريد الناس تسمع بالونين
وأنت تدري أشكثر جنت آني حزين
لا يرد لا بالبجي لا بالحجي لا بالسؤال
كلشي صاراليوم عندي من المحال
كلشي صار من المحال

اعذر خربشاتي
كما جاءت وأنا أقرأ
تحياتي

[شاكر السلمان]

هاذ هيَّ .. هي هيج
كلشي بالدنيا زوال

لاتكول الزمن مُرْ
كول هو الفرح شال

مابقى منا السعيد
للحزن صرنا الهلال

مانشف دمعج يا عين
نبجي بيهم
كلما نكتب مقال

[محمد الفهد]

ردت أصرّخ يا عواطف والله شاكر
وردت اشك ثوبي وألطمك يا صدر
تدري شنهي الكضني لو سويت كادر
بس لبستك علبقوا ثـوب الصبــــر
يا حسافـــه الراح منا مـو مسافــر
لـو كبل منــه ردت يكضــــي العمر





القديران الاستاذه عواطف
الاستاذ شاكر
عذرا عن الاسماء المجرده في الابيات
وشكرا لروعة تواجدكم
اسعدكم الله

[عواطف عبداللطيف]

آني ما گضني الصبر
الصبر من عندي شال
رحل عني من زمان
بعد شي يفيد السؤال
والفرح عافة لدربنة
والحزن صار الحلال
ولما مر العيد بينه
ما شفت ضي الهلال
لا حقيقة اللي صار
مو حلم ولا هو خيال
كلشي زال كلشى زال
حتى ضحكات الجهال


مع تحياتي

[شاكر السلمان]

جيت يم امي وبجيت
كالت ها يابني تعال

شبيك ياوليدي حزين
كلت يا يمه احتلال

يوم كل واحد بديره
وشردو حتى الطفال

كتلو اولاد النحبهم
وغيّبوا أم العيال

[عواطف عبداللطيف]

أخذوا الغالي العزيز
والحلم أصبح محال
والنزف رافق دربنا
وصار واحدنة مثال

[محمد الفهد]

خلص دمعج يا عيون
من عزيز الروح شال
عوسجت بر ماكو ماي
كصبه نبتت بالرمال
صار حال الروح هيج
زاد حتى اعلى المحال
يمي علي وصرخ عليه
آخ أخ يـــا بويه تعال
خل تكول اخبال بيه
اليدري والما يدري كال
مل تره منــــي الونين
وحتى مني الضيم مال





أسعدكم الله اساتذتي

[الدكتور اسماعيل الجنابي]

لذيذه .. جميلة .. حلوة .. معطرة ..

تلك الكلمات التي نثرتها هنا ..

وزاد حلاوتها ردود الاخوة والاخوات ..

كنت سعيد جدا بتواجدي في بستان الشعر الشعبي العراقي ..

الأستاذ فهد .. وجميع من شارك معك هنا ..

أبدعتم .. حفظكم الله ..

تحياتي