|
رد: الأبوذية
صرت لكليبي انفاسه ومية
رجيتك تمشي وي كيفه ومية الف مرة انجتل لاجلك ومية رصاص الشوك يبن ادم علية .. الف مرة انجتل لاجلك واناشد حبل وصلك تشد لاجلي وانا اشد مواويل الحزن اطرب واناشد تطرب روحي بملكاك إلية .. بمواويل الحزن سارح وشارد حرت شاكتبلك بهجرك وشارد ومن بعدك صرت تايه وشارد من هجرك تشب النار بيه .. شمس تحرك كفة كليبي واناظل لحد الموت انا اسعيلك واناضل اذا تفاركني يا ولفي انا اضل اوافي وياك لحد يوم المنية . . . التميمي |
رد: الأبوذية
ﭽـثيرات العليك ذنـوب ******* شنعـد بيا منهن أسولف بعــد ******** شنعيد أبشرنك لبست السود ******** شنعيد شلي بالعيد يالمبعد عليه |
رد: الأبوذية
عليْ مهما يبيــع النـــذل أنـْفــهْ
عزيز أكضي الحياة ابرغم أنفهْ الكبر للي يمــوت ابعِـــزْ أُنّفَـــهْ وأرّفهْ من بيـــوت أهـل الدنيّـه |
رد: الأبوذية
احني راسك الربك ونخ له
وحط صاحبك بمنخل ونخله انه اللي زرعت شجره ونخله بلكي اليجي يترحم عليه |
رد: الأبوذية
شفتها بالدرب تصرخ ييابه = كلت هذا الحلو منين الله يابه
كلبي للحقد يرفض ويابه = طول العمر عايش بالرديه |
رد: الأبوذية
خده شكد حلو يزهي وخاله
سبه أهله وابن عمه وخاله يتبختر بخطواته وخاله وكل اللي يشوفه يظل بأذيه |
رد: الأبوذية
بوجنته حمره تسبينه وخاله = سبه عمه وابن عمته وخاله
يتمايل بخطواته وخاله= وبهجره شفت كل الأذيه |
رد: الأبوذية
كافي بعد انتظر لو بس تُمُرمر (تأتي)
الگلب لمن غبت عانى وتُمَرمر ( تعذب) حتى الأكل والشرب بالحلگ مَرمر (مذاقه) بالغربة كلشي حلو ضاع من ايديه عواطف عبداللطيف |
رد: الأبوذية
شمحله علزند والله وشمها
مثل الورده اصل ليها وشمها الواشي صدك سواها وشمها حرمني من الحلو راح من اديه |
رد: الأبوذية
ابكلبي ما بقت ياصاح همه
وعلى ابعد نجم يزداد همه بيوت الهم لعد دلالي همه وبيها يسكن الغالي عليه |
رد: الأبوذية
عزيزي ليش ما تركب الجاري
وتسحب خويه حسابك الجاري قبل ما ينوخذ كالما الجاري من اللي تشتكي منه الأذية |
رد: الأبوذية
رائع .. احسنت
|
رد: الأبوذية
شفت هواي بس گلبي يبيها
لأن كل الحسن معجون بيها حرت الكه درب امها و بيها هلي والناس هم خافوا عليه |
رد: الأبوذية
عنده خدود ورديه وشفه
ريك العسا من ثغره وشفه لون يقبل يظل يمي وشفه تروح اهموم هلجانت عليه |
رد: الأبوذية
تكتب والقلم باريه...
والدعا للرب باريه.. لاتجازف بالليالي.. ترى الحلم تاليه ياكل الوقت والمخبى فكر بنفسك تعليه |
رد: الأبوذية
بحبك هلكلب ذايب ولعبه
لا يشماغ يستعمل ولعبه أشوف الفار يتلهه ولعبه الهر لو غاب يتسودن عليه |
رد: الأبوذية
هجركم شل يميني وبعد يسراي
بكيت انه أسير وضرني يسراي خبرهم من يجيبه الي يسراي ويخلي دنيتي ضويه عليه |
رد: الأبوذية
عندك بالكلب لوعات يجلن
حروفك ياحلو مايوم يجلن تدري شنهو للأحزان يجلن وصال وضحك من تجبل عليه |
رد: الأبوذية
جاك المرض بس توني علمته
وآنه اللي على الخوه علمته جنت هايم وما أدري علمته أبقه انشد عليه صبح ومسيه |
رد: الأبوذية
بوجه الشامت اتعبس وصحبه
لا تهتم اذا عافك وصحبه رافج بس وفي صادك وصحبه تعيش بكل هنه وبلا أذيه |
رد: الأبوذية
جروحي ياخلك ماكو طبله
محد نشد عليها وطبله روحي بفرح من تسمع طبلها تركص من أشوفك مو بديه |
رد: الأبوذية
الخلك سمعيني واعتقدي ولج فان
كافي هجر مو راحل ولج فان هدومي احتركن وكلبي ولجفان ضاكن بالقبر والله عليه |
رد: الأبوذية
الهجرك كمت بس أحسب واعده
ماعندي غلط صاير واعده من جذبك لبست الذل واعده من عرفت انت تخون بيه |
رد: الأبوذية
رسمك علكيته بحبل وسلاك
وهذا العمل ماسويته بسلاك سليت وكلبي مايرضيه بسلاك وخليت الحلك تضحك عليه |
رد: الأبوذية
اسامح من يأذيني وراعي
واحفظ كل محب صادق وراعي صديق الحق اله حرمه وراعي بس ماحب انه اليجذب عليه |
رد: الأبوذية
كل جروحي هل نشفن وطابت
بشوفك نومتي عذبه وطابت روحي عندك تغني وطابت ومن تهجر تهيم الدنيه بيه |
رد: الأبوذية
شو مر السبت سرعه وجمعه
مامروا علي طلعت وجمعه بس أحمد رفع ايده وجمعه يضربني يريد شلون بيه |
رد: الأبوذية
هجرني الولف لسه الي مارد
هواه الكلب غيره ابد مارد جن الله خلقه من جن ومارد سود عبشتي كلها عليه |
رد: الأبوذية
دموعي هواي ثوبي شكه من البل
كلي شلون اعوفنك من البل الوصفها ماغلط اقرب من البل سمره وعلى الناقه جت اليه |
رد: الأبوذية
انت اللي طعن روحي وسمها
بالذل والله هجرانك وسمها بالحب يلهج كليبي وسمها كافي هجر يمته تحن عليه |
رد: الأبوذية
حضن بغداد گلب امي ووريده
كلما اكبر ادور عليه واريده وگلبي من البعد صاير مريده راح بعيد وظلَّمت عليه |
رد: الأبوذية
حبيبي عد خواله أمس ما بات
محلق عد عمامه لعب وبات وبحبه الي دوخني مابات دمعي من صدوده يهل عليه |
رد: الأبوذية
حبيبي من هجرني لسه مايه
ليالي الهجر وصلن لعد مايه دمعي هلتشوفه نشف مايه وتدري بيه ما أحمل خطيه |
رد: الأبوذية
كلبي للشماته دوم يابه
يصيح بصوت عالي ولك يابه منهو اللي علي الولف يابه بعذب بالكلب صبح ومسيه |
رد: الأبوذية
زرعت روض الكلب أزهار وأوراد
أقدمها الحبيبي شطلب أو راد بالليل اقره بس ادعيه وأوراد بلكي الحلو يوم يحن عليه |
رد: الأبوذية
يرتاح الدلالك كلبي والعين
دمعي مثل ماي البحر والعين شكد خلوا علي جاسوس والعين مايردون نمشي احنه سويه |
رد: الأبوذية
عسى أيام الهجر راحت ولا جت
روحي عله الولف ونت ولاجت جف دار المحب لامي ولاجت وحدي بكيت بس اصفك بديه |
رد: الأبوذية
اون عليك طول الليل بيداي
سكيتك مي ورد ياحلو بيداي لجل شوفك كطعت انهار بيداي تالي تروح متسلم عليه |
رد: الأبوذية
تعال اسكن وسط كلبي هوا لك
عمره ما هوه غيرك هوالك نعمه من الزمن انه هوا لك نعيش بفرح منشوف الأذيه |
رد: الأبوذية
كليبي جاب لي ولفي وجمعه
لنثر ورد بدروبه وجمعه غاب السبت والأحد وجمعه ومن يرجع لطشله واهليه |
| الساعة الآن 01:48 PM. |
Powered by vBulletin® Version 3.8.9 Beta 3
Copyright ©2000 - 2026, vBulletin Solutions, Inc.