منتديات نبع العواطف الأدبية - غزل خاص جدا ( بعيونك لغز ماواحد يحله)

منتديات نبع العواطف الأدبية (https://www.nabee-awatf.com/vb/index.php)

- - غزل خاص جدا ( بعيونك لغز ماواحد يحله) (https://www.nabee-awatf.com/vb/showthread.php?t=20732)

غزل خاص جدا ( بعيونك لغز ماواحد يحله)

غزل
،،،،،،،
هذا النص فاز كأجمل نص غزلي في مسابقة اقيمت على مستوى جميع شعراء المحافظات
،،،،،،،،،
بعيونك لغز ماواحد يحله
يطعم العافية المانكدر انمله
يل شايل برمشك سحر مامشيوف
بينه بكل كتر ربيتلك عله
طولك من يمر يزرع السجة عيون
ويعيل خياله بيه ونستحي نكله
موش عكول بس حلوك داخت بيك
معقولة البشر بيه ينعجب ظله؟؟
النوارس شافتك ظلت عليك تطوف
والهذا السبب وحشه أصبحت دجلة
الورد مابيه ترافة الورد يمك شوج
وبيه لمن تلزمة تبين الخلة
وي أنفاسنة عطرك التف واندار
يل امخلبص اشلون تريدنه نفله
مر ريج العسل والصوم أثر بيه
وبمحراب ثغرك كبّر وصلهّ
ولأن صارن شفافك جنهن هلالين
فطر بسوالفك وبسكتتك حلّه
هوااي عيون شفنه الكحل منها انباك
بس إنت الوحيد الكحلتك كحلة
نمد جف النظر بس موقصدنه نبوك
القصد بلكت علينه الحاجب تسله
عيونك صح إلك بس كمنه بيها نشوف
مرّة أيامنة وبشوفتك تحله
تفاح البخدك كونه شرط الضوك
وحقك مابقت جوه الشجر سله
ديوانك رحب بس بيه فنجانين
مايرضن عليهن تنحني الدلة
هنه بزودهن كل وكت مرتفعات
حون رهبة الوادي وكشخة التلة
الكالو ماكو ظل للشمس جذابين
ودليل اللي نكولة بوجهك تجله
بعز الصيف ظلها إعله الارض ينشاااف
لوفوكاها وجهك شبر يتعله
خارطة الحسن من راسك الرجليك
عوجة المسطرة بس صبتك عدلة
سبحانة الجمع بيك الثلج والنار
بحرنه وي البرد ظليت تتسله
بجدمك كلها تحجي وانت جنك ريح
الدرب طاحت جدامة يريد يوصله
الغبشة الفوك عينك صرنه بيها طيور
اشوي اعطف علينه وميّل الكذلة