منتديات نبع العواطف الأدبية

على شط القنال سمعت السمسميه بتنادى
على الغريب اللى لف كل المدن
وما انتظرش شهادة شكر لانه اللى بيشكر الشهيد
رب بيفدر الشهاده واللى بيضحى بصدق وايمان
كانت شمس الاصيل بتلف المدن الثلاثه
وبتصدح مع كل طلقه
وكل دانة مدفع وبتبعث مليون رساله ورساله
للى بيصلى واللى بيدعى واللى حاطط ايده على خده
واللى متمسمر قدام الراديو بيستنى خبر
مين مات ومين انتظر ومين
تقدم وفحت بالميه شوارع
تهد ظهر اللى بنى تحت ارض مصر خط اقوى من صمت العرب
واقوى من كل اللى سلم بقوة جندى عمره ما انقهر
برليف كان فى ايد البطوله ميه واسهل
من كل السكوت
عرفتوا يا عرب كيف ممكن نموت ؟
مش من قوة عدو خوى علينا لكن من خنوع واستكانه
وتسليم بالهزيمه
هو الغزال بيفترسه الوحش ليه ؟
عشانه سلم انه حيموت
فى يوم اكتوبر صلى الجنود
وصاحوا بكلمة السر الله اكبر
وباسم الله الله اكبر
تقدموا
وانتصروا
مصر العروبه كسرت الحواجز وسارت على درب الفدائى
اللى فى ال 68 كسر رايتهم الممسوخه
وعانقت النجمه والقمر سطح القناه
وغنت البواخر بزماراتها
مصر مش لقمه صايغه ممكن يفكر يفترسها كلب
او يسرق مكانتها اى حرامى ادوار بيفكر انه
ممكن يسرق الكاميرا من نجم
توسط سما العالم وانتصر
مش بالكلام لكن بقوة شعب وامه ممكن تتجمع وتهزم نمر الورق
وتبعث رسايلها من جديد
وتصوم وتصلى وتؤمن بان العروبه لغه وقران وحضاره
وشعوب حيه عمرها ما بتموت