حصيلة دارمياتي في المساجلة
فدوة العمر للزين فدوة لحضورة
الدنيه عتم وليل من غير نورة
*
اصبر يكلبي ارجوك للنبض هدّي
لو خان دهرك كول أزمة وتعدّي
*
لمّن تجي يهواي النبض يرتاح
فدوى العمر للزين الجاي والراح
*
لا يرجع ولا يعوف كلبي بحالة
اشكد حاولت انساه بس استحالة
*
لو تدري شنهو الصار يمكن تعذرة
والذنب بالأعذار ربّك يغفرة
*
خلاني عايش دوم والقلق دربي
متردد وحساس يهديه ربي
*
الوجع طول الليل لازم نحمله
بس بالوجع يهواي الشوق يحله
*
الكَلب من فركَاك تايه وهايم
وانته بلذيد النوم غركّان عايم
*
منهو اليداوي الروح غيرك حبيبي
من دون كل الناس وحدك طبيبي
*
حبك يداوي الروح والوفه طبعك
والله أبد ميهون عليّه دمعك
*
أنطر طوال الليل ردّك يجيني
مو صوجي صوج النيت يا بعد عيني
*
مو بيدي يالمحبوب بيد الله هايه
لاجلك عفت انوار تبجي وراية
*
شوكَي إلك يزداد جن بحر والله
حبك يا بعد الروح من عسل كلّه
*
عمدا أصيح بحيل..وينك حبيبي
حسنك شمس عالكون يا شمس غيبي
*
ينتظر طول اليوم ..كلبي يريدك
عني طرت لبعيد .. مكَدر أصيدك
*
غيبتك مثل السيف عني دشيله
كيف المحب يهواي يكتل دخيله
*
كيف المحب يهواي يكتل حبيبه
ما تقوى عالزينات سوّي مصيبة
*
هو المحب يهواي يصون الأمانة
كلشي أسامح بيه إلا الخيانة
*
الغدر صعب اهواي ياهو اليشيلة
لو خان بيّه اهواي من اشتكيله
*
كاعد بوسط العين مثل الدمع بس
لوّ الوفا جلمات جان الحجر حس
*
ما كَصّرت وياك يشهد عذابي
رخصت لاجلك دوم عمري وشبابي
*
من فركتك لليوم مارتاح بالي
والغالي منّ ايغيب مكانه خالي
*
ماتكَلّي شنهو الصار عنّي متسألْ
كّلبك عليّ يا حيف مال وْتبدّلْ
*
لا تهمل الحبوك وتبيع ودهم
وتروح سد الغير وتعوف سدهم
*
باجر يمر ويروح هم بعد باجر
انت اخترت محبوب بالحب يتاجر
*
بس كلي يالمحبوب لمته أوافي
نارك تضج بالروح وماكو مطافي
*
العين من ما جيت جاري دمعها
بس الله يا محبوب يدري بوجعها
*
من فركتك لليوم ما شفت راحة
متكَلّي ليش الشوكَـ ما بي استراحة
*
رحت العصر للروض حسبالي اشوفك
بس شفت دمع العين تغسل طيوفك
*
شفت البدر بالبيت ضاويلي خدّه
ماكو احله من محبوب واكَعد بسدّه
*
شنهو اليصبر الروح لو انته غايب
يجري الدمع بالعين والكَلب ذايب
*
شمّتت بيه الناس وانته متدري
بالكلب صار الآه والدمع يجري
*
يمته أشوفك عاد والكلب يرتاح
لمّن تجي والكاك كل همي ينزاح
*
تدري أنا بليّاك لا وطن عندي
والتفت هين وهين أحسبني هندي
*
البعد صعب اهواي والقرب غاية
يبقى الكَلب يهواك حتى النهاية
*
كلما تمر أيام يحزن حبيبك
خافن يموت ابساع وما يلتقي بك
*
بلكي تجيني ابساع والعمريحله
بالشوكّـ مجتمعين فرات ودجلة
*
أسهر واصب دموع ويطول ليلي
من صدّك وفركاك مهدود حيلي
*
أبجي بتوالي الليل شوكَي ذبحني
بالحزن والهم دوم متروس صحني
*
كم ليله أظل سهران لاجلكْ ينايم
الناس كلها بعيد بس آنه صايم
*
الليل إجه يهواي وبعيد انته
بكليبي دك اجراس والدنيا سكتة
*
بلكي تجي يهواي تمسح دمعتي
نزرع ورد وازهار في بور وكتي
*
الوجع عندي يزيد ساعة غيابك
كل العمر يهواي فدوة لشبابك
*
اكعد أنا وياك وانسى همومي
يا كمر بس بضياك تسعد نجومي
*
بلكي تجي يهواي ساعة واشمك
كلبي ترة يهواك جن كلب أمّك
*
ما جذبيت اعليك يا روحي انته
شوكي الك بستان بالحب زرعته
*
مكدر ابد أنساك رغم المسافات
فدوة الك عمرين الجاي والفات
*
تدريني من فركاك شفت البلاوي
طبعك يبعد الروح للهجر هاوي
*
ولهانة روحي عليك يا عمر عمري
كافي هجر وفراك مو خلص صبري
*
تزرع بكَلبي ورود ما يوم تذبل
عطشان وانت الماي اشلون تقبل
*
انته الضوا للعين وللكَلب نبضه
أعمى أنا بليّاك اشلون ترضى
*
كافي هجر يا زين مو خلص عمرك
والله سئمت العيش من نار هجرك
*
آنه الجنت مرتاح شالله بلاني
من دون كل الناس حبيتك آني
*
ارحم حبيبك عاد كاعد يتاني
صدكني رايح موت كبل اواني
*
بس كلّي يالمحبوب اشلون اشوفك
تتعذر انت اتكول صعبة ظروفك
*
من سافرت لليوم ما وقف دمعي
وانسيت كل الناس حت هلي وربعي
*
انت الضوى للعين وللكلب بهجة
يلشوفتك يا زين بعدال حجة
*
بيك العتب ما فاد وضاع التعب بيك
قربة وطرف مثقوب ما ينّفخ بيك
*
من رحت عني بعيد تزوجت الهموم
امتى تحن وتعود ينتهي هالصوم
*
الغربة بالدلاّل تطرح وتجمع
جنك يبعد الروح حالف مترجع
*
أشتم عطر ملكاك والدنيا تحلى
والدنيا وردة تصير والكلب نحلة
*
تدري يبعد الروح روحي تريدك
مثل الحقل للماي انطر بريدك
*
ماتكلّي شنهو الصار واغدرت بيّه
حتى الذي ويّاي صارو عليّة
*
آنه اريد اهواي كاعد بصفي
يحلف وحك عيناي ما بعد يجفي
*
حزني يروح ابعيد يومن تجيني
امتى تجي وتكون فرحة سنيني
*
حيلي نحل والروح تنتظر جيّه
دحمل جرارك عاد وامطر عليّه
*
العين ليل انهار جاري دمعها
والروح طول اليوم تجتر وجعها
*
كل شعري يا محبوب لاجلك اكتبة
لَنّك حبيب الروح واغلى الأحبة
*
كل هذا وانت النوب ممتطي هجرك
جنّ البعاد اشموس تضوّي فجرك
*
ونخلي هالشمات اتطك مهجهم
ودفء اللقا يا زين نار وتوجهم
*
مسجون بيك سنين مهيّض جناحي
ما فكرت فد يوم اطلق سراحي
*
انحب توالي الليل والهم لحافي
لية السهر والشوق والولف غافي
*
ظليت أغني الليل آه بأثر آآآآآآه
نايم وليف الروح لو ناسي ما انساه
*
كلبي وكع يا ناس وينه اليشيلة
مدري شنو اللي صار وانهدم حيلة
*
بس لا تروح ابعيد وحدي تخلين
نار وتشب بجلاي والدمع بالعين
*
بعدك حبيبي نار ما تنطفي ابساع
تحرك تذوب الروح والكلب ملتاع
*
الوفه يا محبوب زاد المحبة
تحسب دموعي ماي وانته تكبّة
*
دم كلبي من فركاك شلال ينزف
والاه بعد الاه اوتاره تعزف
*
يصعب عليه اهواي بعدك يقاسي
فضفاض حزني موش على مقاسي
*
ما جذب اني عليك يا غالي مشتاق
بعدك صعب يهواي ناره م تنطاق
*
أسأل عليك الناس وينه حبيبي
وارجع وانا الوسواس يترسلي جيبي
*
باللي جره والصار بس الله يدري
ليل وكلب مهموم والدمع يجري
*
تدري ترى المشتاكَـ مهدود حيله
العمر يجري بيه وما بيده حيلة
*
لو كطعوا المرسال زحف أجيلك
هم اسعد بملكَاك هم أشتكيلك
*
جرحي شوكت يهواي تجي وتداويه
عمري ظلام وليل لو ما تضوي
*
اطلب من الرحمن كلبك يحن لي
دنيا بلا محبوب خلها تولّي
*
ليش الفرح يا حيف ينكَضي بسرعة
وكت الحزن مضروب واحد بسبعة
*
اشما تغيب وياي حاضر بكلبي
واتمنى طول اليوم يسعدك ربي
*
كلما امر بالدار اذكر حبيبي
واتشوّق الملكاه يطفي لهيبي
*
نجمة ورسمها الليل تزهي وتكابر
حكها تباهي الكون عاشكها شاعر
*
قاسي عليك اكثير يا كلبي غاليك
ما اكثر الأعذار لو راد يجفيك
*
تدري انته كلش زين اشكد أحبك
ترميني بالهجران يالقاسي كلبك
*
كافي قساوة عاد مو صبر ما ظل
وكليبي من فركاك من حسرته مل
*
ليش ابعدت لبعيد وانتظر كَربك
لو انته سم يهواي أتمنه اشربك
*
مو تدري كلش زين لجيتك أتاني
وحدك حبيب الروح ما الك ثاني
*
كلبي يون اعليك والونة جمرة
والعمر يمضي ليل ما بيه كمرة
*
بس كلي يالمحبوب .. امتى اشوفك
وافرح أنا بملكاك .. تسمح ظروفك
*
هذا الكَلب مليان طيب ومحنّة
من يمر يملي الكون انسام جنة
*
لو انت لو ما ريد .. مهما حصّلّي
ما راح أبدل الزين كَلبي يكَلّي
*