وين تـــريد ؟؟
=======
وين تريد...
يا زورق حياتي المبحـر بلا ماي
وين تريد
قسى وياك الزمان أدري
وكل يوم الهموم تزيد
وﮔضه نص عمـرك مناطر
عناﮔيد العنب متلولحات بعيد
ونشف شط الموادد والحـﭽي ميفيد
وزين أدري بزمانك شيّخ الثولان
وانطاهم قصور وغيـد
وبنّي شطوطنا صادوه بالنتال
شصك ظل بعد شيصيد
ولبسهم حرير الوان
وأنت تكابر بفد ثوب
من كثر الغسل خايف عليه ايبيـد
أدري بالبلابل سكتاهه الخوف
وانمدت لِسن غربان للتغـريد
وين تريد....؟
وأنت اعضاك ﭽلن لا رجل لا أيــد
وين تريـد ؟
لا .. لتهاجر وعينك تهل دموع
تره خلاف الوطن محـد يمدلك أيــد
أدري بمكر أخوتك لولحاك ابير
بس ما تدوم...
الدنيا ملوّنة ما بين حــر ورعيد
لازم يوم وكتك يمـد ﭽفـه احبــال
وينصبك ملك وأخوانك يسجدون
وأنته شتامر وشتريـد
ويردلك زمان أيامه مختلفات
وانزع عمـرك المحزون
والبسلك عمـر أيامه كلهن عيـد
ها شتـﮔول ...؟
غيّـر دفة المبحــار
وأرجع للشواطي الحالمة بالماي
صيح بعلو صوتك
فالتعش بغــدااااااااااااااااااااااااااد
إنهض يا عراق حسينا من جديد