حفظ الله أخوتي وأخواتي وكل أخت وأخ كسبتهم في مسيرة حياتي
\
الخوَّة ذاك الصدر
لو ردت يوم انتجي
يسمعلي بكل فرح
ويكُلي بسَّج بچي
؛
الخوَّة ما مش حطب
اتچملة حتى يزيد
ايدين تنمد إلك
وماتتنه وگفة عيد
؛
الخوَّة گول وفعل
الخوَّة دم جاري
لو جتي دفَّرة صفح
يصيح يا ثاري
؛
الخوَّة هيَه السند
لمن تهب الريح
الخوَّة مثل الوتد
يوكف الك لتطيح
؛
الخوَّة مثل المطر
بيها معاني الوفة
الخوَّة مثل الگُمَر
تصَحَّي الگلب لو غفة
؛
الخوَّة مثل النخل
بيها افتخر ياناس
الخوَّة شيشة عطر
مليانه بالاحساس
؛
الخوَّة مثل الأرض
بالطيب نرويها
الخوَّة وصل الرحم
ربَّي وصة بيها
\
10\10\2017
عواطف عبداللطيف
التوقيع
آخر تعديل عواطف عبداللطيف يوم 10-18-2017 في 10:08 AM.
الخوَّة
العرض الشجري