ما محتاج

ما محتاج
\
ما محتاجه حبَّةَّ نوم
نمت و بنومي ما شفته
بس محتاجه إله كومات
حتى الزمن فهمته
گلبي اشما اسكته يون
والونَّة اصبحت دكته
كحل العين صار دموع
من يوم اللي فارگته
ورمش العين بس يرف
وايدي تسَّكت برفته
هو اول عشك للروح
وكل الناس عارفته
صعبة من يمر الليل
وآني بوحدي ناطرته
بضلوعي تشب النار
حتى النفس حاركته
تعب جسمي يهزَّه الظيم
وآني الظيم راضعته
شنو نفع العتب وياه
وهو العبَّرة خانكته
يمته راح اشوفه عاد
شو كلها غدت سكَّته
ادري للزمن هم ضاج
واني بحچيَّ دوخته
گلبي تعبَّته الونات
هموم الغربة ناخرته
صعبة الوطن ما ينعاف
هجَّروني ترة وعفته
بچيت ودمعي مثل النار
وبيتي الغُرب ساكنته
حتى هدومي باگوها
وباگوا كلشي عايفته
وبقيت اصرخ ولا همهم
حتى الصخر سمَّعته
وأخوية يگلي بسج عاد
لمن صدره غرَّكته
وأمي تگلي اخاف عليج
دهجعي ما إلچ سكَّته
ردت افرح ولو لحظات
حتى الحزن چتفته
وضليت احسب الأيام
تالي أبد ما ضگته
وترست اجفوف ايديه اشموع
حتى لعمري اشعلَّته
وابد ما راح اخاف الروج
حتى الروج عودَّته
أحن وأشتاگ طول اليوم
رغم الصار ماعفته
ما اكدر ابد انساه
وآني بچبدي زارعته
نزف گلبي عليه هواي
وجرحي بشفتي عاضضته
ياخذني الحنين هناك
حتى الوجع حيَّرته
عشگته وأدري راح اتعب
لكن تعبي حاببته
مثل غرگان أدور عليه
حتى البحر صاحبته
وما ضل بالصبر شباچ
رايح جاي داگگته
ادري للزمن هم ضاج
واني بحچي دوخته
وادري معلگة بخيوط
هسة يوصل ويمته !!
ولو يطلب حياتي انطي
حُبه بروحي عاجنته
لحظه شوگ من عينه
تنسيَّ للگلب علته
وبوسة خد تهدَّي الروح
مثل العسل من شفته
وجف تراب وية الماي
أحنَّي جفوفي لو شفته

\
عواطف عبداللطيف
4\1\2016

	احساس ولا اروع صور جميلة منسابة احسنتِ وابدعتِ

اقتباس: المشاركة الأصلية كتبت بواسطة عامر الحسيني     احساس ولا اروع صور جميلة منسابة احسنتِ وابدعتِ

شكراَ ابني الغالي
حماك ربي
محبتي

توقفت طويلا هنا أمام شلالات عشق ..وشوق..وحنين

أحسنت

اقتباس: المشاركة الأصلية كتبت بواسطة قيس النزال     توقفت طويلا هنا أمام شلالات عشق ..وشوق..وحنين أحسنت

هذه الشلالات استاذي لا يشعر بها ويحسها إلا من عانى الغربة ووجعها
شرفتني وقفتك الكريمة
منحك الله الصحة والعافية
تحياتي وشكري

ياله من وجع رصين موغل بالحب الصادق
والشوق الروحاني الحارق
لم تكن حروفا فحسب.. إنها حفلة دمع غزيرة الأمطار
لقلبكِ الهناء ماما المبدعة

كلي الزمن هاي شبيك كتله الولف كعدته

من البرد خفت عليه بوسط الكلب دثرته

كلي يازمن شتريد كافي ولك خبلته

جم ورطه بليته كول وبجم بير وكعته

حروف رائعه تنفست الآهات وزفرت الأحزان

وتبرقعت برداء الأسى بالصبح والمسا

تحياتي سيدتي الفاضلة

اقتباس: المشاركة الأصلية كتبت بواسطة الدكتور اسعد النجار     كلي الزمن هاي شبيك كتله الولف كعدته من البرد خفت عليه بوسط الكلب دثرته كلي يازمن شتريد كافي ولك خبلته جم ورطه بليته كول وبجم بير وكعته حروف رائعه تنفست الآهات وزفرت الأحزان وتبرقعت برداء الأسى بالصبح والمسا تحياتي سيدتي الفاضلة

شكراَ دكتور على المشاركة الجميلة التي جعلت حرفي ينزف وأنا أقرأ ليكتب بعضاَ من همومي
وفقك الله
تحياتي وتقديري

اقتباس: المشاركة الأصلية كتبت بواسطة حنان الدليمي     ياله من وجع رصين موغل بالحب الصادق والشوق الروحاني الحارق لم تكن حروفا فحسب.. إنها حفلة دمع غزيرة الأمطار لقلبكِ الهناء ماما المبدعة

شكراَ ابنتي الغالية
لا حرمني الله من اطلالتك
حماك ربي
لقلبك السعادة
محبتي