فززيتيني ========= انتي دكيتي عليّه باب نومي وفززيتيني ومن سالتج انتي بت من ؟ شلون اجيتي؟ وليش؟ والمن ؟ شو سكتي ؟ ما سمعتيني؟ ردت أرد وأجمع شتات أحلامي وأغفة بس نسيت رموشي بيج معلكات وانت رحتي وما سالتيني وما قريتي عيوني زين وما طلبتي اثبات شخصيتي وعرفتيني ردي بس أرجوج اكعدي آنه اريد اسأل وأريد تجاوبيني صفنة عيونج حجت قصة غريبة وحيريتيني انتي نبته وعودج أخضر بس نبتي بكاع سبخه وما كبرتي انتي وردة وضوع عطرج ما تعدى حدود طولج وانختكتي انتي شمعة وانطفيتي بحلك بارح وحاوليتي يرد ضواج وما كـدرتي انتي غيمة ضامة غيثج سنين وما مطـرتي يا بطن حاسب لساعات الولادة وما طلكتي انتي مهــرة وما كدر خيالج يجبش كفاج وحيل غــرتي أنتي يا ثوب الحرير ولابسه واحد غغشيم وبيه ضعتي أنتي مــر عمرج مقيمة اعله الصيام وحان لج وكت الأذان وما فطرتي أنتي طير منجّـر وصيده صعب ليش من نيشن عليج اعمى سكطتي أنتي يا خرزة سليمان ونكول العارفة ويه الحصو خـلوج ورخصتي انتي يا عود البخور شحطج بحلك المداخن واختلط دخانهن وي عطرج انتي انتي يا كطـرة نـدى وبممـحل الكيعـان طحتي انتي يا ماي النبع شنهي اللبط بيج وخبطتي وانتي ....انتي ... انتي يا كل الطباع الحلوة انتي انتي بت من ؟ شلون اجيتيني؟ وليش دكيتي عليـّـه باب نومي وفززيتيني ومن سالتج ما سمعتيني *************
فززيتيني
العرض الشجري