جرح واحــــــــد / الى الأستاذة عواطف عبد اللطيف

جرح واحــــــــد

الى / الأستاذة الحاجة عواطف عبد اللطيف

الجرح بيك ...
بس أحس الوجع بيّه
الجرح بيّه ...
بس لأن أنت الضماد
ما أحسّن بالوجع
أر أسألك يا أخوي
هم شفت فد يوم أصبع
عاف أخوته الأربعه
وأغتاض وي جفه وطلع
لو شفت مره النهار
الليل راح بعيد منه وما
رجع
لو شفت فد يوم واحد
شمري من الجنوب
وماكو أيد لشمري ساكن
( حديثه )
تاكل وياه تمر بصره بفرد
ماعون وشبع
لو شفت من العماره واحد
يطكَونه أعلى خشمه
وشفت أخوه من الرمادي
ما بجت عينه ودمع*
لو شفت من ( المثنى )
وحده حره لو أجى أيذلها
الغريب
وصاحت أتحشم الأولاد
ومن سمعها زلمه نشمي
من ( الدليم )
ما لكَف سيفه وفزع
والمؤذن لو يؤذن للصلاه
والمصلي بالجواد كَام
يسجد
فرد ساعه ...
بالمعظم كَام أخوه صلى
وركع
ومن ذبّحوا خطارهم فوكَ
الجسر
يوم صاح الكاظم يفزع
المعظم
شفت .... ظل ( عثمان )*
ساكت ما سمع
العراقي من رضع من ثدي
أمـــــه
ما رضع بس الحليب
من الثدي حب العراق
أشكَد رضع
أحنا واحد ... جر ح واحــد
لا يفرقنا الغريب
واحد وزائد الواحـــــــــد
صار واحد وأنجمع
صار واحد وأنجمع

* مثل عراقي( طكَ الخشم تهمل العين )
* الشهيد البطل من أهالي الأعظمية أستشهد
في حادثت جسر الأئمه