حكاية مثل

(هي مو رمانـة بس الكلـوب مليانـة)

فد بنية اسمها فخرية تزوجت وعاشت ويه عمتها أم رجلها بنفس البيت
وجان بيناتهم يومية قارش وارش .. عمتها كلسع تدعبل للچنة فد حجاية تخليها تشوط وصارتلك العيشة متنجرع
بس بقت ساكتة لأن حامل
وتوحـمت على الرمان وبوكتها مو موسمه وظلت تلوب عالرمان
راح رجلها يدور بالسوك ويسأل فلان وفستكان بالكوة جاب رمانة وحدة !
وفخرية نشنشت من الفرحة وتملكـها الإحساس بالعظمـة وتباوع لعمتها صفح ورافعة تك حاجب , يعني عود باوعيني شلون ابنج ميرفضلي طلب ويموت عليه

كامت للمطبخ ورجعت شافت عمتها دتاكل بالرمانة ودتمطك
تخبلت طبگت الفيوزات وكمزت على عمتها وتكافشو
مخلو شي وبدا الصياح
فخرية _ يبااااوووو اكلتي رمانتي حتطلع طگعة بوجه الجاهل من عاب هيچ بيبي

البيبي _ ه يباااووووو

الجوارين اجوي يتراكضون ديفاككون المالخ مالتهم
كالت جوارينهم تحاول تهدئتهم :
_ شجاكم كل هـالعياط علمود رمانة ؟!!
جاوبتها فخرية :

_ هو مو من الرمانة بس الكلـوب مليانة

وأخذ المثل يضرب عندما تمتليء القلوب لتنفجر حين غفلة