الف دارمي ودارمي بقلم عامر الحسيني

	481 لا مره لا مرتين... كتلج تعالي خلي الكَمر فرحان طول الليالي

	482 يبنيه كافي احزان.. يبنيه كافي عمره الحزن مافاد كَلب اليوافي

	483 نادت عليج الروح ..تسألني عنج حسره بكَلب مشتاكَـ ..اخذتها منج

	ردا على الشاعر ذياب الميالي حين قال: خويه الأمل موجود ياطيب الذات بس الحزن مرفوض بعيونك يبات. ذياب الميالي 484 خدّرد ليلي الشين ..صكَعاته بالروح يا خويه مامش زين بالساكَك اجروح

	ردا على الشاعر ة عواطف عبد اللطيف حين قالت: ياخوية ما مش زين تخليني وتروح شنهو اليسَّكت الروح والگلب مجروح عواطف عبد اللطيف 485 يمه الدليل عليج خزن مصايب فوكَـ القهر شمات صاروا حبايب

	486 ادعي اله الكون كون الله يهديه خافن تصيبه الناس من شارتي بيه

	487 ولفي واحبه اهواي ... لاجنه يا حيف يركض وره الاوهام حسباله توظيف

	488 يمه الدهر خوان ...موش أبأدينه كلما نريده ايهون يصعب علينه

	489 شفت الدهر والناس والدنيه ضوجه حتى البحر ناديت بس جتني روجه

	490-1 تلقيت اول الصباح نبأ وفاة صديقي الشاعر عدنان القيسي رحمه الله واسكنه الفسيح من جناته وانا لله وانا اليه راجعون وبعد خفوت موجة البكاء قلت :- موش بدمع ياعين تبجينه اليوم نزفي دمه العدنان والكَلب مالوم *** استغربت هاليوم ماشفتك أترد خالي يبو أركان كَلبي بوجع صد