دارميات عراقية 3

مدري شتريد الروح من عنّك تروح
جنها العجوز تصير من تنعى وتنوح

من عيني طلعت نار حرگتلي رمشي
من شفته من بعيد وي غيري يمشي

جن فوره بيّه تصير من عنّي تبعد
ولو سيّرت عالبال بعيوني تكَعد

( لا ارضه جاري تصير لا عني تبعد
ولا ارضه عني تكوم لايمي تگعد)

لو لحظه مر طاريك وابّالي تخطر
الكَلب يرعد حيل وعيوني تمطر

( أنطرح بس ما انام مثل الينامون
مو ملح صم حسبات طايح بالعيون)

حبّك بوسط الروح زارعته بتله
لو شبّعتني غياب ما راح ابدله

( الحلك لو ينقاس وي نسبة العين
ناتج رياضي يصير واحد على اثنين)

بين النفس والآه هياته كَاعد
لا يمي وافرح بيه لا عني باعد

تانيتك وماجيت ،،،،،يالملتهي شبيك
فوك الجمر ممدود ماكتلي اخليك