على درب اليمرّون أريد أكعد ونادي

	محتاره روحي بكتْ بالكـعده والروحه ساعه أكــولـنْ إجه مو رفـرفـتْ روحه وساعه أكولن بُكَه والـروح مـجـروحه وتـاليها أكــولـن وفي ميعـذبْ بـروحه خليني أنزف عشكَـ وحروفي مذبـوحه

	تعاتبني وتكول معاشر النسيان ونا بيّا النار ظلت تشتعل جوّه شلون أنساج.. يلْ اسمج على شْفافي طفح غنوه شلون أنساج ..وليلي بْدون همسج ما بعد يسوه شلون أنساج .. حْبَيْبَهْ وساكنه بالروح وغيرج ما إلي سَلْوه تظلين بطريقي النور ومنج أستمد قوّه

	يا هـيلْ يا شمس الشــتا .. يا ورده يــا تــفـاحـــه يا أنـقى من كَــطر الندى .. يا أحـلى مـن قِــدّاحــه روحـــــي بهواج معلكَه .. وأدري تـظلْ مِــرتاحـه وكَلبي اللي ظنيته انتهى .. شماله يْخفكَـ بجناحــه يِفْــــحَطْ مثل طفل انفطم .. وبسدري عالي صياحه جمْ مَـــــرّه جوّوه وهمد .. واخـْضـر يـظـل سِبّاحه عـــذبني يحبيبه العشكَـ .. ما يــوم شفـت الراحــه