كل يوم أكول اليوم=يمكن يبينون
أخافن أموت بساع=لو تعمى العيون
كل يوم أكول اليوم=من حزني أرتاح
بلكي يجوني اليوم=وأنعل ابو الراح
كل يوم أكول اليوم=للكُمر لتروح
بلكي يهل الصبح=وتمسحلي الجروح
كل يوم أكول اليوم=للزمن غدار
يمتة يصير الصبح=وأفرح بخطار
كل يوم اكول اليوم=أصبح وألكَااك
لو تدري هذا الكَلُب = أشكثر مشتاك
كل يوم أكول اليوم= الصبر صبرين
واحد يداوي الروح =والثاني للعين
كل يوم اكول اليوم =يابعد روحي
من كُثر شوكي ليك=نزفت جروحي
كل يوم أكول اليوم=يدكلي على الباب
يمسح دموع العين =ويحجيلي الأسباب
كل يوم أكول اليوم=بلكي يطلعون
كافيهم يهدمون=وكافي يبلعون
كل يوم أكول اليوم=بلكي الجرة راح
وأرجع لداري بساع=والغربة تنزاح
كل يوم أكول اليوم=والنجم شاهد
عيوني تسيلن دم=للصبح كاعد
كل يوم أكول اليوم=ياأهلي ياطيبين
فد لا يروح العمر=بشوك المحبين
كل يوم اكول اليوم=يارب يا هادي
طول الصبح والليل=أصرخ وأنادي
كل يوم أكول اليوم=يارب يارحمن
ترفع الغمة بساع=وتنزاح الأحزان
كل يوم اكول اليوم=يارب يافتاح
أرجع لحضن الوطن=أنصب الأفراح
رد: دارميّات عراقية
العرض العادي
