صور من ذكرياتي
\
آني عندي ذكريات هواية حلوة ويه الصور
الصور وكت الطفولة ويَّ كل خوتي وخواتي
ووية جيران العُمر من يلتقون
والعُطل سفرات كلها للمعالم وللزيارة ومنها هم نوفي النذور
والصور مال الدراسة ويَّ أحلى الناس عندي بالعلوم وبالرياضة وبالفنون
والصور مال التخرج ويَّ ربعي والأمل مالي الوجوه
والصور مال التخصص بالوطن البعض منها وقسم منها چان برة لأن همَّي بالعلم كلشي يهون
وصور شغلي والشباب الحلوة چانوا گلب واحد يعملون ولمن اقسي شوي عليهم يفهمون,, وهمه رغم التعب كُله يفرحون ويضحكون ويبدعون
وصورة أمي ويه ابوية
يوم عرسي
والدمع يملي العيون
وصور ابني وصور بنتي وية ابناء المحلة يلعبون
وصور جيراني الأحبة بالحرب من جنة نخبز ومن نبادل بالصحون
وصور بيتي من بنيته آنه وابني
حجرة حجرة حتى للفرحة يكون
وصور بغداد الجميلة
والجوامع والكنايس والمتاحف والدواير والمدارس والجسور
والشوارع والملاعب والورد مالي الحدايق وبالسما اشكال الطيور
وصور دجلة والمقاهي والنخل بعثوگة يزهي وعالجرف محلى الزهور
وصور حلوة لبيت أبوية ولمة الأحباب كلها
الأهل وية الچناين والنسايب والگرايب بالأعياد وبالفطور
وصور للأحفاد كلهم لما يتزايد عددهم عالدرج لو بالحديقة يفطرون
ما دريت الزمن يعكس
وتالي بالآخر يخون
وكلها راح تضيع مني
وما بقى إلها أثر
بس صور من ذكرياتي الما تخون
\
14\4\2018