مچتول بسمارك

مچتول بسمارك


من حسنك لگيت الروح تحچي هموم
گلي بياذنب من نزلت الدمعه

جسيت الگلب والگلب مامجيوس
كومه سنين ساكت محد يسمعه

خليني اعله صبري راهم آنه اعليه
مو صابر دليلي وحچيك يفزعه

هيجت المعاتب والحچي المضموم
ومكابر دليلي وصدك يگطعه

صفطت السوالف چلمه چلمه وياك
والشوغات حلفن سري طلعه

مدري شبدلاك وصابر آنه اعليك
وذنوبك چثيره وچتلي مشرعه

يلحسنك نهار وشايخ اعله الليل
وطبعي شما اغيره مچلب بطبعه

خصرك ياترف سبحان من سواه
اوجر حيل بيه وزيّد الجرعه

مچتول بسمارك والگلب يهواك
رمشك بالحشا يالساحر مودعه

صديت الإجاني منك بيمناي
غافلني دليلي ومرّك تجرعه

من شچيت گلبي بفاله ما وجيت
وصوابك غميج ولادوه ينفعه

تحملت الوجع وصار بيه الصار
ردتك تتنخي وصياحي تسمعه



حسن الشيخ ناصر