ناجى العلى
مفتتح
يا حنظلة فينك
أنت وفين العم
الدم صار مش دم
رحلتوا سبتونا
ونجيتوا من ده الهم
يا عمنا ناجى
مقتول أنا وراضى
أشرب همومى بسم
منقوع فى ليل الذل
يا عمنا ناجى
لسه فى قلبى عم
الداء كبر
أصبح تاريخه فى دمنا
عايشينه عادة
وعادى أصبح مننا
ناكل ونشرب .. نشربه
ننام وننجب .. ننجبه
لو يوم وجعنا يتحبس
فينا الألم ونبلّعه
بحبوب طناش
ورفض باهت فى الكتب
الصرخة مكتومة
ومحسوبة على قد الخطاوى
اللى بمشيها لورا
الأرض مالت م التعب
ومن الحدود المقلقلة
والخوف خريطة رسمها
دائنا بهمنا
يا أرضنا
يا كعكة متباعة لكل رخيص
وتتهادى لكل غريب
يبدلها .. يعدلها
يقطعها بكل مزاج
لمساطيله .. بعاداته
وأفكاره وصهيونه
وأصحابه وعفاريته
صهاينة بترعى,, تتحكم
بتؤمر .. تفترى .. نسمع
ونرضى الصهينة .. نصهين
ونتصهين ونرضى
بمسخنا مسخة ونتهود
أنا من بعدى ألف طوفان
ونتعود
فى سيرك عبيد بنتروض
وخارج سيركنا سيد
ومتمرد
ورافض إنه يتهود
وناجى م العبودية
أمير فارد قلوع حلمه
على كل الوطن ناجى
وناجى من خيانتنا
رفضت تكون وكنت يا بوى
شهيد شاهد بتتحنى
بلون الحق والجنة
كلامك صرخة فى وشوشهم
خطوط مرسومة من دمك
خطوط مرسومة بالإصرار
ومن لون النهار وارثة
عناد موشوم على جلدك
خطوط ورتوش من الثورة
ياثائر ثورتك ثورة
زلازل للعدو تكسر
ضلوع الزيف وتتفجر
وتكشف للغبى عورة
خطوط .. حكايات يتتحاكى
وتحكى الظلم والعتمة
وضعف وصمت م الأخوة
والف خيانة فى الدايرة
وأم شهيد بتتوضى
فى زفة شهدا للأقصى
ودمعة قدسنا حبرك
يا ثائر يا شهيد شاهد
وحنظلة صاحبك الرافض
مشبك إيده ورا ضهره
يشوف .. يشهد يعلمنا
وياخدنا معاه فى الصورة
نتألم
من الخنازير وعمايلهم
وتنطيط القرود بينا
لصوص سارقين عبايتنا
لصوص تحكم وتتحكم
وتفرض أمرها الواقع
بفرد ضفاير الشيطان
على كل الوطن تنصب
مشانق للفسطينى
وللسورى وللبنانى والمصرى
تمد إيديها وبتنهش
وطن مجروح ومفتوحة
بطونه ومرمى ع الجدران
وطن دايب من التوهة
ومن حكام باعوه بدرى
ملوك رؤساء على شعوبهم
فيران وعبيد لأسيادهم
بلا استثناء
ايا ناجى يا عنتر
ماسك الريشة
وتكسر عرش حكامنا
بتطمس كل قوانينهم
بلون اسود لأرواحهم
قدرت تدوخ الدنيا
وترسم صورة الأقصى
على جدار الالم بسمة
هلالى سلامة كان دمك
بطل مغوار يا أرجلنا
يا راجل جوه حى عيال
بيتكسفوا
من الدورة اللى ملياهم
ودم الحيض على وشوشهم
وريحة الذل سكناهم
ما بيهشوا ولا ينشوا
ولا حتى بيتفشوا
كروش بتجيب فى ألف كروش
يعيشوا بس فى سريرهم
بيستنوا يناموا لما يتعشوا
آهين يا عمنا ناجى
يا حاضن تار ألوف حالف
لتاخد حقهم بيدك
يا عارف سر عروبتنا
يا عارف سر نكستنا
وشايل همنا فى قلبك
( قلوب العارفين لها عيون *
ترى ما لا يرى للناظرين )
يا واسع قلبك الواسع
يشيل ضيعتنا والحارة
وألف ميدان وشوارعنا
ولو على أرضنا زيك
وفيه قلبين مع قلبك
ودم أصيل مع دمك
لكانت أرضنا حرة
نصلى الصبح فى الاقصى
وعصرنا يبقى فى الكعبة
ونتوضى فى حيفا ويافا
ونكبر فى تل أبيب على النصرة
لكان المسجد الاقصى
آذانه يوصل المريخ
ويعلى ويبقى أعلانا
لكانت ألف حطين
وألف صلاح بيتكلم
وصوته يهز أمريكا
تتطاطى لأمره تتقزم
وتبقى أوربا فى ايدينا
صغيرة لسه تتعلم
نكون أسياد على الدنيا
ايا ناجى يا عايش لسه مش ميت
أنا شايفك
فى كل جدار بترسمنا
تملينا حروف الثورة وبطولتك
وتهدينا أمل من سيرتك الحلوة
وشايفك فى عيون طفلة
وطفل فى ايده أحلامك
حجارة تهز مدافعهم
وشايفك فى بطل ملغوم
بفجر نفسه ويصرخ
شهيد بيهز أركانهم
ويتفجر شظايا بتألم الخونة
وبتفجر قلوب صخرية مفجوعة
انا شايفك وشايف قلبك الطيب
وريشتك سيف على رقابهم
وحلمك لسه قدامنا
أيا ناجى
انا مش بكتبك فى رثاء
لأنك حى مش ميت
بطل لسه وبتعلم
وللأبطال مفيش مرثية
ولا دمعة
فقط هما اللى يرثونا
للأبطال تاريخ أمة
بيكتبوا فيه بأحلامهم
للابطال زهور تضحك
وتتحنى من الدم اللى لسه يسيل
على جبين الوطن عزة
______________________________________
* من الشعر الصوفى
ناجى العلى
العرض العادي
المواضيع المتشابهه
