الى امـــــــــــــــــ (ابنچ بديرة غرب ) ـــــــــــــــــــي

الحلـــــــــم الحزيـــــــــن
..................................................
الو الو ...
هلو يمه ... شلونچ إنتي
زينه يمه ؟؟؟
آني زين هوايه يمه
فقط ، ينقصني غيابچ
فراگي هدّ الحيل يم
إوذبّلت زهرة شبابچ
روحي يايمه إزرعتهه
شتله يايمه إعله بابچ
*****
عندي يمه أخبار حلوه
بالغرب صارتلي سلوه
يمه آني إزوجت
يمه وبيوم العرس
يمه هلهوله ردت
عالشفايف دحَگـّت
عيون تضحك ماشفّت
من بعدهه تأكدت
كلهه يمه الحضرت ليوم العرس
كلهه يايمه خرس
يمه صار إوليد عندي
اِيعوضج يايمه بعدي
الو الو ... آخ شو خلص رصيدي !!
ساكت الهاتف بأيدي
الگطع مو باتصالي
الگطع صار بوريدي
*****
إووووصفنه تاخذني غصب
وحشه ياليل الغرب
والله وفراگ لحبيبه
والله ياعالم صعب
غفله شو طسـّت عيوني
غمضت ع الهم جفوني
وحْلمت چن آني راجع
أطوي خطوات الشوارع
بيد أمي أرمي ابني
واحچي لوعات إومواجع
*****
يمه هاذ ابني كبر
يمه خطـّه إعله الحجر
يمه بس فتحيله ايدچ
خلي يغفه بحضن جيدچ
لا تعلميه السهر
يمه وأحچيله قصصنه
الچنتي تحچيهه زمان
چنه نتحين فرصنه
وچانت الدنيه بأمان
چنه نركض على الفزعه
واللي يطلب مانرجعه
چنه ماليهه حنان
*****
وبعد يمـــــــــــــــه ..
بلله يمه وسولفيله
عن بطولات الحروب
جفني ماغمضله ليله
والجرح بينه يذوب
واحنه حبينه جرحنه
هوه نيشان الشرف
وشاهد بسوح الخطوب
*****
إيـــــــــــــــــــــه ..
وشرد اكلچ ياحبيبه
عن مضيف وناس طيبه
يمه احچيله إعله جاري
من ولع فد يوم داري
نزع ثوبه وطفّه ناري
وماطفه إمن الضيم گلبه
*****
ويمه ماظنّي نسيت
هم بقت أشياء عندي
مابعد بيهن حچيت
اي ييمــــــــــــه ..
شلون؟ هم نساني همـــــي
ما سالتچ عن زرعنه
بعده أخضر؟
لو تغير من طلعنه؟
والنخل گوليلي يمه
طلع بموسم طلعنه؟
واذكر تگولين يمه
يمه حط الماي اسگي
بلكت يفتّح وردنه
هوه فتـّح؟ لو ذبل من شاف يمه
كوم دمعات إعله خدنه
والرصيف البي گعدنه
هم تجي يمه وِلِدنه؟
چان يَمّه الگمر حاضر
إيمسي ليليه إبعگدنه
يمه وأطفال المدارس
غبّشو مثل النوارس
بلله هم يمشي وراهم
أبو عليوي الچان حارس؟
*****
يمه وأوراقي القديمه
هم بعدهن؟
يمه لو ليلة غضب ..
صار دمعات إعله خدهن
من شجرتوهن حطب
وأرد أسالچ آني عنه
اشلونه دفتر ذكرياتي
هوايه أشياء بحياتي
ارد أسولف آني عنهه
گلبي مشتاگ لحضنهه
وبنت جاري من خطبهه؟
آني چنت أطلب گربهه
يمه تسع سنين عمري
من گلت يايمه أحبهه
*****
يمه محتاج لحنانچ
حيل ضميني ييمه
يمه عشت سنين غربه
مابعد بالحيل همه
هناك ياما دوّرت
مثل حبچ ماشفت
وياما گضّيت الليالي
يمه تبچين إعله حالي
بارده هناك المشاعر
ياهو لي يگلي يغالي
وياهو فارشلي فرشتي
وياهو حضرلي لگمتي
وشرد أسولفلچ ييمــــه
يمه أذاني السهر
خلص گلبي إمن القهر
يمه جبت إسنين عمري
إمصارع آني إويه الدهر
وهسه صرتي ابين ايدي!
يمكن احلــــــــــــــــــــم؟
اي أحلم .. يمه گوليلي علم
خاف أفز إمن الحلم
*****
وعندما فتحت ذراعها لتضمه اليها
جاءه صوتٌ من الجانب الثاني
بابا بابا ....
واستيقظ من حلمه الجميل دون ان
يعانقها .

(بقلــــ(ام زيـــــد)ــــــمي)