مساجلات نبعية

يلّي رحيلك صعب ماتنوصف حالِتك
ممشاك يصلب صلب تكتــــل كتل فرگِــتك
لولاك اني اختنگ أتنفس بـْريــــــّتـــك
ظنـّيت حچيك كذب صارت صدگ روحتك
بارد صرت يالچنت نار وجمـــــر غيرتك
واني العرفتك صبح عين الشمس جابـِتك
ترضاهه من نفترگ يالفـــرّحت شامـِـتك
مو چنه دهن ودبس مااقلقت راحـِــــتتك
لو لحظه مني زْعلت روحي إجت راضـِتك
لالا كذب مو صدگعين الحسد صابـِتك
　



وادعيتك
وروحك الروحي حرز
وگلب يبچي عالبچاه
انت كل طيبة اهلنه
وانت عالم من محنه
ضَوّه بالغربه سماه
والله نَزَلتو دمعتي
من شفت عالشفه آآآآآآآآآآآآآآآه
واه آه وحسره حسره
وعيشه مرّه
وگلب مضيوم بحياته
خلص صبره
وخلص وياهه عمرنه
لاهجسنه الضحك مرنه
ولا فرح وَيــاه أخذنه
ويانه مايدري الحزن ياهو مداه
وين حده ؟ بي نهايه ؟
مالانهايه
يمشي
يمشي واحنه
احنه هم نمشي وراه


ءوصوره ضاعت بيهه آلاف الصور
إوضيعت حتى الگمر
من شِفت نخله ابـّلادي احترگت بغير الشَرر
من شفت دمع اليتامى
يسبح بنصه البحر
　من شفت دم الغوالي سايح بمجره النهر
من شفت　شايل جنطته
　يگول چا　وين السفر
ماعرف ليش السفر
وماعرف وين السفر
اختصرلك هاذا كله
بصوره وحده من الصور
من شفت بغـــــــــداد تبچي بليل ظلمه
تگول چا وين الگمر
اغتالو الدوله العظيمه
　وضاعت بايد الغـِدَر
هذا حالچ ياصور
من حِكَم　000
من حِكَم
قاسي القدر0


　


جيـــــــــــــــــــــت
شايله بايدي لهفتي
على بابك 00واگفه
ترجف خطوتي
گوم
وتلگاني شوگ
بچف حنانك
إسگي 00عطشانه00وردتي
وهلّي بيه
والتفت باوع عليه
اني مو آني صرت
لا00 آني هيه
هواي ذبلني الممات
من بقايا من رفاة
من خبايا السالفات
انتفضت الاشواگ بيه
وجتي تطلبلي حياة
وفي طريقك00شفت دنيه
اتذوقِت طعم الحياة
گوم رجعلي العمر
الضاگ احزان الهجر
وفاض من عنده الصبر
يازليخه بعشگ يوسف؟
ياهو ليلى العامريه؟
ياهو عبله ويابثينه
كلهن انقهرن عليه
من سحن حبك ضلوعي
وگلت اكثر حيل بيه
لان حبيت بجنون
واطبعت صورة خيالك
وغمضت بيهـ العيون
وخفت افتح عيني مره
خاف..تذبحني الظنون
وين جياتك عليه
ردت تحيي المات بيه
واللي بيه 00بيه بيه وماافكر ليش بيه
بيه لوعات وقهر
وبيه الام السهر
وبيه بسمار البشر
كلهه دگت طعنه بيه
ومره في لحظة ضعف
شگد ردت تگبل عليه
حتى تدري شصار بيه
ومن لِفّه طيفك مسيه
إنسيت كلشي 00كلشي منك
كلشي عــَده 00وكلشي فات
ولحظه وحده مانسيتك
وهسه جيتك00



من تجون
نفرش دروب المحبه
هيل
واشواگوشموع
عيني ملت من بعدكم
إومااظن الكم رجوع
ولواجيتوا
الكم گليبي دليل
إوروحي مصباح بدربكم


لو تصير الدنيه ليل
ءو مااظن جيات الكم
بالهجر ضيعتوا حبكم
وضاع من عدكم　گلبكم
واني بالفرگه عليل
والمسافه مو عذركم
تگرب دروب الاحبه والبعد يصبح قليل
وحلم جيتكم علينه
وموبدينه
قسمه وانكتبت علينه
نعيش نتنطر گربكم
إ ومن تجون
گلب يتلگه گلبكم
گبل لا تنمد ايدينه0



　

عادتنه رش الدرب لمن نودع محب
بس انت لمن رحت طشيت شرياني
يـَعْراق دهرك صلف كل لحظه عندي بألف
وين الله من التفت الگاك بحضـــــــــــاني




عطشانه روحي وردت ترويني انهارك
روح القصايد صرت تكتبني اشعارك
عالباب روحي تدگ هاي اني خطارك
خلني اعله باب الگلب وخلي الگلب دارك
وخل أتــّگاطر فرح وَحْلَم بانوارك