( آه وآه............. يا وطــــن ) قصيدة بالعامية المصرية

آه وآه............. يا وطــــن


وأحلامك
بتنزل زى
دمع برئ
على خدك
وقدامك
تلاقى
حلم- حلم
حزين
بيتساقط
من الشجرة
اللي قلعوها
على بابك
بتجرى
جوه جنبات المكان
وتنوح
وتنده
آه.. واه يا وطن
*******
تشيل العتمة
على كتفك
وتمشى تبيع مواويلك
يا ليل يا عين
على امبارح
وامتى يا بكرة هتجينا
تشيل من قلبنا الجارح
تغنى . تغنى
ما تغنى
ما تلقى لا شاري
ولا بايع
تبيع البيعة
ما اتباعت
وباعوا الكلمة
من حلقك
سلام على حقنا
وحقك
تروح من تانى
تستأذن
لغات مشغولة
علشانك
حروفها الخوف
بيتكلم وينده
آه .. واه يا وطن
*******
رايات الصبح
محروقة
بيد الليل
على قلبك
رمادها
زهور بتتخبى
من الأشجار
عشان تحبي وتتنفس
رمادها
"منسي" يتعلم
يعيش لو مرة
مش ميت
رمادها
قلب عصفورة
حزين
يتمنى لو يقدر
يطير بجناح
ولو واحد
لحد طريق
ما لوش آخر
رمادها يا صاحبي
أسئلتك
عن البنوتة والشايب
وكيف اللعب والنايب
وامتى الباب بيتوارب
وكيف الواد بيتعلم
يسيب البنت واللعبة
لحكم الجوكر الشايب
يتوه في سطور
أسئلتك
ويرمى جوه أوجاعك
حروف مجروحة وبتنزف
وتنده
آه... واه يا وطن
*******
وشوش الناس
ماهيش باينة
من التوهه
وريحة الصمت مالياهم
وقلقانة حروف
"الواو".... و"ط".... و"النون"
ما بين الصمت والتوهة
وحيرانه
ما بين شريانك الساخن
وبين مواويلهم الضايعة
حروف قلقانة
حيرانه
تساوى يا صاحبي
أسئلتك
عن الوطن اللي في الأدراج
والوطن اللي كان أبراج
تعالى يا صاحبي
نتوضى
ونقرأ الفاتحة ونصلى
صلاة الميت الغايب
ونستني
ولادة حلمنا المجروح