شهر الفرح

جانه شهر الخير والود والفرح = وكلب كل مسلم تره بيه انشرح

هاي أيامه زها بيها الرجه = من العذاب اللي يصومه هلنجه

علسمه نباوع وكلنه انكول اجه= وحبك بكل كلب نابت واتضح

ياشهر نشكيلك احنه من الزمن = شفنه بيه اشكال والوان المحن

والخلك عاجبها تمشي بالفتن = وماعليها بالذي كلبه انجرح

باشهر كلمن توله مايعف = جنه يطلب ثار والمبلغ كلف

وحالة الناس بحزن ماتنوصف= مايشوف الزين بس يمه الذبح

كلمن تسأله يكلك مسمعت = مثل هاي الحاله والله وماشفت

توني بآثار الحقد توني اعرفت = كلمن بأخلاقه دمه هلنضح

ياشهر بيك المحبه والدوه = واللي يعمل خير لو هو نوه

كلبه بالأفراح يبقه ومنجوه = بنهر صافي ونيته هلبيها سبح

نبتهل لله وبجالك ياشهر = تزيل غمتنه وتوخر هلقهر

انته عودت الخلك عذب الصبر = واليصومك بس تره هو الربح