وبين
مفارق الطُرق
فيه مُنعطف
قلبى إنجرف
وف ركن
فى حُضن الطريق
شايفاه وقف
رافض يواصل دقته
قاعد بينزف دمعته
راكع
على ركبة ف مذلة
مخلّفة حبة هوان
ومربياهم ع السُكات
النبض مات
يْتلّفت الضلع
اللى حارس ع الأهات
وبسُرعة تانى يحّركُه
لما استعان
بنبضة راكنة من زمان
خباها جّوة الروح
عشان
العُمرهان
وآدى الأدان
صوته مجلجل ف المكان
حرّك مشاعر سِكنته
من بعد ما صلى
استكان
وهداها بعد ما لفها
بشريط هدية
من ضلوعه وشدها
وحلف عليها وقالها
تبصم وتمضى عهدها
بحرين محبة وسيل حنان
عاشوا ف أمان
كتب الزمان
روحها وروحك
تئتلف
من بعد ما
نبضك وقف.