وطن يعتب عتاب آباء لأبناء
وطن مجروح , وجروح تزفّة
*****
خنجر مو سياسي بظهرك يصير
ولو بيدة , حتى اسمك يحذفة
*****
واحدهم يجر بعرض وبطول
ويخت الي يشيلة هم يزرفة
*****
مو مسألة جيب وهاك وانطاك
ولا مصلحة ومال اعلينة يخفى
*****
لكن هالبلد ينرادلة كلوب
وضمير يفيض من عيونة عفّة
*****
وأزيدك يا حبيبي من الشعر بيت
عراقك هذا اعدائه تحفّة
*****
اذا مرتــــاح ما تهتم باليصير
نام براحتك يا عمي وسفة
*****
وسفة ابن الوطن يكظيها جوعان
وانت عالترف شبعان تغفى
*****
انزل عالشعب شوف القهر بيه
جم حرمة تبيع بسوك وكفة
*****
جم محتاج يبحث عالشغل وين
واذا ما يلكة , للشارع يرصفة
*****
وشفت اصغار توكف بالدرابين
تستجدي اليجيها الما تعرفة
*****
شفت عزة وكرامة بكل الوجوه
فقيــــــر ويرتدي اثواب عفّة
*****
وسياسي يشرب النفطات ترياق
ترة مضمومكم , ابداً ما يخفى
*****
مصالحهم عريــــــضة بعرض الامتار
وحق الشعب , بالله شوية كصفة
*****
عراق , ويا عراق شوكت ترتاح
ومن كل المصايب يمتة تصفى
*****
بعد الياوكت نصبر على الآه
جزعنة والصبر صار النة وصفة
*****
كضيناها خريف نضيع السنين
تهز بينة المصايب مثل سعفة
*****
تيهنة الطريق بيا كتر صار
ومن هم العلينة ما نعرفة
*****
علي حسين
عراق , ويا عراق شوكت ترتاح
العرض الشجري
المواضيع المتشابهه
