للترويح عن النفس - منقول

لما كنا صغار كنا نكره الحمام بتعرفو ليش ؟💔🍃✂

لانه أمهاتنا الله يرحمهن والعايشات الله يطول بعمرهن كانو يعذبونا تعذيب لما يحممونا ..
الله العليم لما تقولي قوم عالحمام أنصرع من الخوف .. تقول بِسْ محشور بغرفه
تبدأ رحلة العذاب من تشليح الاواعي ..
تشلحني الكنزة تقول بتنتّف بريش جاج .. وآذاني كل أذن بجهه .
طول ما بتتحمم بدك اتضل قاعد قرفصة ..
طيب يا حجه والله رجليّ وجّعوني ..
عالسريع بتناولني كف وبتقولي سكّر ثمّك ..
بالنسبه للميّة لازم تكون تحت درجة الغليان بنتفة .
يا يُما لحمي ذاب !!
بيجي الكف التاني ..
لما تفرك راسي اقسم بالله تقول بتفرك بمصباح علاء الدين عشان تطلّع المارد
وراسي بلولح يمين ويسار اتقول دالية أيام الشتا.
والمشكله لما ينزل صابون عوجهك وبدها تقيمه بتغير ملامح وجهك .. غير حرقة العينين
المشكله إنها الصابونة ( المفتاحين أو الجمل ) أقسى من الحجر .. والفرك بيها تطريح ..
نيجي لعند ما تمسك خشمك وتقولك " ننننفففففف "
بتصير تنف من آذانك .. لأنه كل مجاري التنفس مسكرة
فقرة التلييف :
بتمسك الليفة وبتفركها بالصابونة وهي تلِد عليك تقول جزار بسن بسكاكينه للذبح
طبعا ربنا حامينا .. والا فركها للجسم بجيب شلل رباعي ..
طيب .. هدّي اشويّ يا حجه أنا حاسس كأنك بتبشري بجبنة ..
طبعا الحمام بالدور .. والكبير قبل الزغير ..
ولما أسمع اخوي الكبير ببكي وهي بتحممه .. أنا بالغرفة الثانية بصير أبكي من الخوف
بعد الحمام بتطلّع عحالك في المراية والبخار قاعد بطلع من جسمك كانك طنجرة ضغط مفتوحة .
الاصابع بكونو مجعلكات ولون جسمك أبيض واحمر من كثر الفرك .
تعال لتلبيس الأواعي ..
راسك قد قبة البلوزة خمس مرات وبدها تدخل راسك خاوه ..
بتلبس أول بلوزه وتاني بلوزة .. ويا ويلك إذا فلتت الكم لما تقولك امسك كمّك مشان تلبسك لبلوزة الثانية .
نيجي لتمشيط الشعر ..
وحفاظا على تنظيف الراس من القمل والشوائب .. بتغرز المشط براسك وببلش الحراث وطبعا في احتمال إنه أسنان المشط يوصلو مخك
مع حمام الغالية .. لو انك صومالي بتصير أبيض 😂💔🍃

رحم الله زماناً......كنا فيه أطفالاً... ليتنا..ولله الحمد
بوركتم أيها القدير

هههههههههه الله يسعدك يا حاج
رجعتنا سنين طويلة لورا
أيام الطبلية وطنجرة الماء المغلي والكيلة الألمنيوم
ياااااااااااااه الله يرحم أمهاتنا

زمن لن يعود وذكريات تئن وتبكي بمخيلتنا
ونحن نترحم عليهن

تقديري واحترامي

والمشكلة كان يأتي دوري وأنا مستمتع بحضور فيلم الأسبوع الأجنبي ( كاوبوي )
ومشكلة لو ترفض ...

رحم الله أمهاتنا ...
كان ليوم الجمعة طقوس






تقول أمهاتنا قارئات على شيخ واحد

نبشت الذاكرة يا رياض