صبر العراقية

رد على قصيدة صبر العراقي للأستاذ عبد الرسول معله

https://nabee-awatf.com/vb/showthread.php?t=29

صبر العراقية

\


گلـــي مــن يــردّ الــروح ويـعـوف الگلــب يـحـلم
جـروحـي تـنـاغت ويَّـجـروح صــارت دوم تـتوسم
لـيل نـهار روحـي تـون مـن شـوگي چواني الهم
شـيـفيد الــحچي والگول خـلي جـروحي تـتكلم
عفتني عِلچه للشمات صرت أمشي بدرب أظلم
وشـوف مـن الـعذاب ألـوان ولا واحـد إلـي يـهتم
وأدواي جروحي طول الليل ودموعي غدت مرهم
غـريبة آنـي وصـديجي الـضيم مـنّه كـمت أتـعلم
أحـس حتى الأكل والماي بشفافي صفن علگم
كـلشي مـا يـداوي الـروح مـن سـور الوفا تْحطّم
خـلـيـته بـجـفـون الـعـين جـنـت أنـتـظره يـتـندم
اثــاري الچذب هــم أشـكـال كـلة مـصفط مْـعَلَّم
تـعال احسب همومــــي اشكد لتگُلي لويش أهتم
لأن آنـي رضـعت الـهم وصـرت بـهمومي أتحزم
هــوّه الـوطـن مـن يـنباع يـزيَّد الـهم فـوگ الـهم
أظــل أركــض نـهـار ولـيـل وغـيري بـيتي يـتنعم
أراقـب مـن بـعيد شـصار وآنـي بـروحي اتگرضـم
واشـكـال الـقصص وألـوان مـدري شـلون تـترهم
كــل واحــد يـغـني بـصوب صـار الـغنى مـا يـلزم
شـليلة وضـاع بـيها الـراس يـا هـو مـنهم الأفهـــم
چواكـــيچ و تــدگ بـالـروح تـخـلي الــروح تـتـألم
ضگت مــن الـحـزن أشـكال حـتى الـحيل إتـهَّـدم
أنــاطـر فــرحـة لــلأخـوان تالي الـفـرح يـتـهزَّم
أنـــا أدري الــجـره والــصـار كــلـه مـكـدَّر مـحَّـتم
يـدهري شـما أريـد تـحل تـقابلني بـجرح أعـظم
مــن صــار الـنـهب عـنـوان اشـلون الـبلد يـتقدم
راح أصـبر عـلى بـلواي بـس راس الـوطن يسلم
بــــــــــــس راس الــــــوطــــــن يــــســــلــــم

\

عواطف عبداللطيف
1\4\2011