المرحوم - محمد كاظم درجال / قصيدة حزن قلعة صالح

المرحوم - محمد كاظم درجال / قصيدة حزن قلعة صالح

----------------------------------------

حيل اوزارجن شدنه يمعزيات

مات محمد الدرجال ابو الوكفات

*****

غمك يازمن تتلكط الطيبين

تتخطه الرعيع بحجة البد ذات

*****

غمك يازمن تاخذ شريك الروح

من حضن الصحاب بلحظة الصفنات

*****

اهمل يامزن واحفر خدودي شطوط

وانزل عالصدر واتلمس الصدمات

*****

واحضن نار صدري ولاتطفي النار

صير الها نفط خل تشتعل صرخات

*****

صارت ليل دنيانا وتريد انوار

وعكوس التصيب الغازي متعسرات

*****

يادانك الطر الهور صوب حفيظ

طاح بنص صريم وشوك ومشلهات

*****

يمحمد يخويه اشبيدي وانه ابعيد

وانت املاوه ويه الوجع والحسرات

*****

يمحمد يخويه انطر دليلي عليك

من صوتك سمعته ابزفرت الشهكات

*****

كتلي انه طحت وبصدري احس الام

وبظهري الخناجر ياعلي مغرزات

*****

احس كلبي لجمني وكلت اخوي ابضيج

من عندي ايتفرهد وايدي مجتوفات

*****

واسمع صوت يمحمد يهد الحيل

صار ازرق اخوك وشخر يمكن مات

*****

انهديت وانحليت واتفلش عمود البيت

يمحمد او مارديت نجمك راح ابد مابات

******

يمحمد اشلون انساك وانت دواي

وانت الماعفتني بساعة الشدات

*****

يمحمد انه المطلوب والديان رافع سيف

والضر اللفاني ايشتت البسمات

*****

وانت الطومرت واعكدت ركبة غيض

كتله انه جبيلك لو صرت أفات

*****

يمحمد طواك الموت والشعلة بجت لوعات

يمحمد طريق التاجي مامربيه بعد هيهات

*****

يمحمد انه المطكوك باليافوخ طكت موت

واصحابك نعم الصحاب ماكصروا بالكلفات

*****

يمحمد واخوتك يشهد الكرار مفجوعين

بس ندري المنايا ايام بالشريان مزروعات

*****

يمحمد عرك مكطوع مامد الجذر بالكاع

بس اسمك يبو جاسم يضل يطوي المسافات

*****

بلايا اوداع يمحمد يبو جاسم عفتني شراع

والروجات تاخذني حلم تعبان للصعبات

*****

من شالوك يمحمد -- صحت اوداعت الله وياك

اريد الله ينور كبرك بنوره ياطيب يبو الطيبات

*****

ياريحة العنبر يارغيف الخير يامضياف

ياطيبة ومحنه وخير ياسنبل حمل خيرات

*****

لاتنعين ابد مامات اخوي محمد ولايات

لون البرد وجهك صار حتى ارتعبت الشمات

*****

ولي فاي

يمحمد منيتي وروحي ** ولي فاي

وانت امن الشمس ظلي ** ولي فاي

فيتك ماتضر غيري ** ولي فاي

بقيت اوحيد بس افرك بدية

------------------------------------

اخوك المفجوع بك ::: ابو عمار الربيعي في 21/12 / 2012م

***************