القسوه حرقت دمنا والحلم مات

السلام عليكم .. مجرد رأي
كلام من قلبي
....

القسوه حرقت دمنا والحلم مات

...

بتلوموني ..؟
وهانت عليكم دمعتي ونبضي العفيف .؟
نسيتوا دنيا عشتها طوبه وخريف .؟
ونبض إبني اللي اتخطف ، من بين ضلوعي
لسّه آهاته وأنـّته ، يرعوا فْ ربوعي
والصوره لسّه بدمّها ساكنه فْ عيوني
حتي الوليد
كانت ملايكة ربنا جايّه تراعيه
فجأه لقينا شمعته داسها الخسيس
اللي مخافشي ربنا وخطف العريس
من حضني ليلة دخلته قبضوا عليه
شوفتوا الحياه ، دايره تعاديه
ساعتها ليه ، سيبتوا الجناه ، يتحدوا فيه.؟
من رزق نيله جوّعوه ..
وبلقمه ناشف سمّموه ..
جاروا علي نبت الصبا
والزهره نشفت من الغبا
من بدر ليله جرّدوه
والنبضه فيه متعذبه
من غير آهات ..
جوّا حيطانهم ضيّـعوه ..
طلقوا غيلانهم حطـّموه ..
رغم السكات ..
القسوه حرقت دمنا
والحلم مات
في المهد مافـْرحش بميلاد
والحزن جوّانا اتخرس
والقلب جوّانا اندهس
والنبض قدروا يدمـّروه
وبحكم ظالم مرّروه
ودا كله ليه ..؟
إحنا الحقيقه المثبته فْ كتب الإله
أرض الكنانه القاهره لكل الطغاه
ييجوا النهارده يدفنوا تحت التراب
خير أجناد البشر ، زينة الشباب
ياااااااااااااااااه
ياجرح قلبي اللي نزف في الكون دماه
صبري عليك هوّا دوايا م العذاب
ونن عيني شايفه طاير في الفضا
بصيت عليه شفت عنيه متبسمه
قلبي اتخلع نادي بفزع ربي فْ سماه
وسمعت صوت ينده يقول ابنك شهيد
ومن إرادة ربنا كان المزيد
أمـَر الملايكه يكرّموه
ساعتها نال كل الرضا
عايش هناك وفْ جنته نال المراد
وبضحكه عاليه فْ توب جديد
نبضت قلوب كل الولاد
من غير ميعاد
لبّـوا الندا
هبّـوا ونادوا للفدا
نزعوا فتيل الفضفضه
والهمهمه
جوّا الميدان ، حفروا الأيات
نالوا الشهاده بمكـْرمه
بقلوب نصاري ومسلمه
وملايكه نزلوا م السما
ساعدوا علي صد العدا
وبأمر من رب العباد
ثوره بريئه مكرّمه
رمز الإراده والجهاد
وعشان كدا ..
أتمني نقضي ع الفساد
وكل أطياف العناد
ونعيش حياتنا مؤمنين
بقلوب محبـّه لكل ملّه وكل دين
يعلا فْ سمانا نجمنا رمز السلام
واللي يحب المصطفي خير الأنام
من جوّا قلبه يحبنا ويقول آمين

...............


أشكركم
وللجميع تحياتي

آآآآآآآآآآآآآآآآآمين~
(الحب والسلام والتعايش)
هُنا أقرأ أحلام مؤجلة وأمنيات~
طاب لي المكوث هنا~
مودتي~ضياء الدين